Science vanga lar ka ni - Stephen Hawking

Scientist ropui Ste­phen Hawking chuan science vanga lar leh khaw­velin a hmelhriat a nih thu a sawi. English pachal Stephen Hawking hi March 14 khan a chenna Cambridge-ah motor neurone disease natna avangin kum 76 mi niin a thi a, khawvelin a ngaisang a, a chanchin hi a dai tawh ngai lo ang.

Stephen Hawking hi mathematics lamah mi bik a ni a, theoretical physicist lar tak a ni bawk. Hetih rual hian amah Stephen Hawking chuan science vanga khawvelin a hmel­hriat leh lar a nih thu a lo sawi tawh a ni. Cambridge University-a professor ni ṭhin hi Black Hole chanchin zir­bing­tu zinga mi a ni a, he a zirchianna avang hian hriat a hlawh hle. Haw­king chuan black hole zawng zawng hi an dum vek kher lo tih zirchianna aṭangin a hmu­chhuak a ni. Hetih rual hian scientist dangte angin thil hmuhchhuah liam tham sawi tur a nei lo thung.

Hawking chuan Black Hole hian ener­gy a pechhuak tih hmu­chhuakin, a hmingah pawh 'Hawking Radia­tion' tih a ni. Big Bang hun laiin Mini-Black Hole an awm a, hengte hi an sa em em a ni a ti bawk. Kum 1970 chho khan particle leh light ṭhenkhat chu Black Hole hian a hip khawm ṭhin tih a sawi a, mahse hei hi U.S physicist Leonard Susskind chuan a pawmpui lo thung.

Stephen Hawking hi 'The Big Bang Theory' avangin khawvelin a hmelhriat a, Black Hole chanchin thlenga zir bingtu a nih avangin a chanchin hi a dai tawh ngai lo ang. Science leh mathematics lamah mi bik a a nihna te, khawvela lehkhabu lar ber pawl 'A Brief History of Time' a ziah avang tein hriatreng a hlawh tawh dawn a ni.