Zaninah Fashion Fusion

Zanin hian Mizorama fashion event ngaihhlut hlawh ber zinga mi, Fashion Fusion chu Millennium Centre Roof Top-ah buatsaih a ni dawn - zan dar 7:45-ah ṭan a ni ang. Mizorama model langsar chu an kim thawkhat ang.

Vakiria Institute of Fashion Technology (VIFT) chuan an zirlai kal chhuak turte kutchhuak pholanna, Fashion Fusion hi kum 2010 aṭang khan an lo buatsaih tawh a, kum tin chhum lo chat loa buatsaih chhoh niin Mizorama fashion event hlun ber pakhat a ni ta.

Kuminah hian VIFT zirlaite kutchhuak endik tur hian designer lar tak tak - Hannah Khiangte, Teremi Ralte leh Rempuii Hmar-te ruat an ni. Anni hian zirlaite kut­chhuak hi chik takin an endik tawh a, zaninah a hmawr an bawk ang.

Fashion Fusion 2018-ah hian Mizoram top model chu an kim thawkhat dawn a, chung zingah chuan Miss Mizoram 2017 leh Miss Mizoram 2018-te pawhin VIFT zirlaite kut chhuak an rawn inbel dawn a ni.

Fashion Fusion 2018 rual hian VIFT Designers Meet neih a ni bawk a, Millennium Centre Rooftop-ah designer hrang hrangte kut chhuak a man tlawm zawkin an zuar a, vawiin chawhma dar 11:00 aṭanga zan dar 9;00 thleng an inhawng ang - thawmhnawte hi 70% discount thlenga pek tlawm a ni.

Entry ticket hi Rs 200/- man niin Vakiria, Lalbuaia Shopping Complex-ah a awm.