Olivia Rodrigo 'Sour' a thur tui leh tawh viau

2nd September, 2021

Billboard 200 chart-ah Olivia Rodrigo 'Sour' album chu pakhatnaah a invawrh leh a, Hot 100 chart lamah chuan The Kid LAROI & Justin Bieber 'Stay' bawk pakhatna a ni leh a ni.

Olivia Rodrigo 'Sour' a tlahniam thei lo
Olivia Rodrigo hian a album hmasa ber 'Sour' hi kar 14 chhung zet Billboard 200 chart top 10-ah a lanpui tawh a, kar hmasa lamah khan pathumna niin tun karah erawh pakhatnaah a rawn invawrh leh ta.

August 20 khan Olivia Rodrigo hian 'Sour' hi vinyl-in a tlangzarh a, chumi avang chuan chart topper hi a rawn ni leh ta a ni. Kar hmasa chhung khan equivalent album units 133,000 lai a hmu chhuak leh niin MRC Data chuan a tarlang a, hemi aṭanga 84,000 lai album sales la ni phakin 76,000 chu vinyl a hralhna aṭangin a ni bawk.

'Sour' vinyl hralh hi kum 1991-a MRC-in Data electronic tracking a tih ṭan hnua kar khat chhunga vinyl album hralh tam ber dawttu a ni phak.

Heti hian 'Sour' hi Billboard 200 chart-ah hian kar li lai mai topper a ni ta a, Morgan Wallen-a album 'Dangerous: The Double Album' tih lohah chuan kumin chhunga Billboard 200 chart topper ni ngun ber a ni. 'Dangerous: The Double Album' erawh kar 10 lai topper a ni thung.

Olivia hi Artist 100 chart-ah pawh pakhatna a rawn ni leh a, he chart-ah hian kar 33 chhung lai lang tawhin vawi eng emaw zat pakhatna a ni tawh. Artist 100-ah hian BTS chu pahnihna an ni thung a, Doja Cat chu pathumna a ni ve bawk.

Billboard 200 chart-a che ṭha dangte
Trippie Redd album thar 'Trip At Knight' chu pahnihna a ni thung a, chart topper pawh lo ni tawh Rod Wave 'SoulFly' chu 38-na aṭangin pathumnaah a rawn invawrh leh bawk.

Doja Cat 'Planet Her' chu palina ni thungin Lorde chuan a album thar 'Solar Power' hmangin top 5 a khar a ni.

The Hot 100 lam ve thung
Single chart lamah chuan The Kid LAROI & Justin Bieber 'Stay' bawk a langsar leh a, Billboard Hot 100 chart-ah pakhatna a ni leh. He hla pawh hi Hot 100 chart topper kar li a ni ta chiah a, top 10-ah kar sarih chhung a lang tawh a ni.

Ed Sheeran hla 'Bad Habits' chu pahnihna ni thungin Olivia Rodrigo 'Good 4 U' chu pathumna a ni ve bawk.