MPSC Challenge Inter Quiz Competition-ah college 13 an tel
'MPSC Challenge, Inter College Quiz Competition 2018' chu March 20, Thawhlehni zan aṭang khan ṭan a ni ta a, zirna in 13 an tel.
Pu Lalrinmawia Ralte, Pilitical Adviser to Chief Minister chuan Competition hawnna hi a nei a ni. Show hi Ignite Studio, Khatla-ah neih ṭhin a ni dawn a, zan dar 8:00 ah ṭan ṭhin a ni ang. Zonet leh LPS chuan show hi live-in an pechhuak a ni. A zan khatnaah hian Govt. Aizawl College (GAC), Govt. Khawzawl College, Govt. Aizawl West College leh Govt. Kolasib College-te an inlan. Nizan khan Aizawl City Colleg leh Govt. J.Thankima College-te an inhmachawn a, DIET, Govt. Saiha College leh Govt. Lawngtlai College-te an inlan bawk.
Zaninah pawh intihsiak hi chhunzawm leh tur a ni a, Govt. Zirtiri Residential Science College leh Pachhunga University College-te an intum dawn a, Govt. T.Romana College, Govt. Hrangbana College leh Govt. Aizawl North College-ten stage sang zawk luh an inchuh bawk ang.
Mizoram Public Service Commission (MPSC) leh Mizo Students' Union (MSU) ṭangkawp chuan kum 2016 aṭang khan Inter College Quiz Competition hi an buatsaih ṭan a, kalpui chhoh zel tum a ni. Quiz hi Mizo ṭhalai tam zawk central service-ah an inziaktlin thei nana buatsaih a ni a, zawhna pawh hi UPSC syllabus base a siam a ni. Kum 2016 khan zawhna kal zawng zawng zinga 38% chhandik a ni a, kum 2017 khan hma nasa taka sawnin 49% chhan dik a ni ta bawk.
Kumin hian Aizawl chhunga zirna-in lian zawng zawngte bakah, District hrang hrang aṭangin College eng emaw zat an tel bawk. Grand Finale hi April 6-ah neih tura ruahman a ni a, show hi Zonet bawhbel leh LPS 10-ah te live-a pekchhuah ṭhin a ni.