Ringo Starr hnenah 'Sir' nihna pe

English rock band lar, 'The Beatles' drummer 'Ringo Starr' chu British sorkar chuan Thawhlehni khan 'Sir' nihna a pe a, an band member zingah 'Sir' nihna nei pahnih an awm ta a ni.

Ringo Starr chawi­mawina hun hi Buc­kingham Palace, Lon­don-ah buatsaih a ni a, Prince William chuan 'Knighthood' nihna hi a pe a ni. A puala hun buatsaihah hian thu sawiin, "Ka zam ve hle mai. Music avangin khaw­vel mit hmuhah phochhuah kan ni a, kan hnathawhte miten min hriatpui a ni" tiin lawmthu a sawi.

Ringo hi a hming tak chu Richard Starkey a ni teh daih a, mahse Ringo Starr tih hi a larpui zawk a ni. Knighthood pek a nih tur thu hi nikum December thla khan puan a lo ni tawh a, mi tam takin lawmpuina thu an lo fah tawh a ni. A puala Buckingham Palace-a hun buatsaihah pawh hian tel an ṭha­hnem hle a, The Beatles member dangte pawhin an drummer hi duhsakna an hlan a ni.

Ringo Starr hi The Beatles-ah hian kum 1962-70 chhung khan drummer a ni a, hun eng emaw chen chu vocal-in a awm bawk. An band hi an lar em avangin hriat pawh an hlawh hle, Ringo pawh hi mite hriat hlawh ber pawl a ni. An hla lar - 'Don't Pass Me By' leh 'Octopus's Garden' te chu a phuah a ni.

The Beatles member Sir McCart­ney hnenah pawh 'Knigh­thood' hi pek a lo ni tawh a, Ringo Starr hming bulah pawh hian 'Sir' a chuang vah tawh dawn a ni.