Fashion Fusion mipuiin an hlut

March 21 zan khan Fashion Fusion 2018 chu Millen­nium Centre Roof Top-ah neih a ni a, mipuiin an hlut hle.

Vakiria Institute of Fa­shion Technology (VIFT) buat­­saih, an zirlai kal chhuak­te puala fashion show hi kum 2010 aṭanga neih ṭan tawh niin kumin­ah hian designer 27-te kut chhuak pholan a ni a, Mizorama top model rual an inlan a ni.

VIFT hian kum tluana fashion designing leh gar­ment manufacturing an zirna aṭangin zirlaite hi mark an pe a; hei bakah hian zirlaite kut chhuak endik tur hian designer pathum - Hannah Khiangte, Rempuii Hmar leh Teremi Ralte-te sawm an ni bawk.

Tehna hrang hranga teh an nih hnuah Baby Remruatkimi chu Queen of Fashion Fusion 2018-ah thlan a ni. Hei bakah hian an thiam bikna kawng hrang hrangah lawmman dang panga siam a ni bawk.

Kumin Fashion Fusion hi a chi dang deuha kalpui a ni a, VIFT Designers Meet nen a kal kawp. VIFT aṭanga inzir chhuak tawh designer hrang hrangte kut chhuak pholanna fashion show hi March 20 zanah a neih a lo ni tawh bawk a; hei bakah hian stall hrang hrang siam niin designer-te kut chhuak hi man tlawm zawka hralh chhuah a ni.

Kumin Fashion Fusion hi mipuiin an hlut a, mipui kal an ṭhahnem hle.

VIFT hotute chuan, "Kum telin mipuiin an hlut niin kan hria a, kan lawm khawp mai. Mizo mipui nawlpuiin fashion kan ngaihlu chho zel a, fashion show kan thlir dan pawhin hma a sawn zel niin kan hria. Mipui an changkang a, kan beisei phak bak an lo kal khawm a ni," an ti a; kum 2010-a Fashion Fusion an buatsaih tirh leh tuna mipui kal khawmte chu an inthlau hle a, designer-te pawhin hma an sawn a, model pawh an ṭhat chhoh deuh deuh thu an sawi.

Fashion Fusion 2018 lawmman
Queen of Fashion Fusion - Baby Remruatkimi
Most Creative - Zodinsangi
Most Commercially Viable - Daphne Hmingthanpuii
Best Craft Endorsement - C Lalngilneii
Best Garment Construction - Lalmawikimi
Best Collection - Christina Lalruatdiki