Josie Music Awards 2021 ; 'World Artist of The Year' nominee BOOM-A

Independent artist-te tana chawimawina sem chhuah ṭhin, Josie Music Awards (JMA) chu September 17 leh 18, 2021 hian a vawi sarihna turin sem a ni dawn a, tun ṭumah hian nominee zingah Mizo tlangval HS Lalruatliana (Boom-a) a tel.

Boom-a hi World Artist of The Year dawng thei tura chhawp chhuah niin, he category-ah hian chawimawina dawng thei tur mi pasarih chhawpchhuah an ni - chung zingah chuan Mizo tlangval a tel ve a nih chu!

World Artist of The Year dawng thei tura chhawpchhuahte hi - Amaru (Spanish), HS Lalruatliana, Booma (Mizo - producer/recordist/guitarist at Sound From The Hills), Antonio Vergara (Spanish), C.C Tennissen (German), Charles Daza & The Revenants (Tagalog), Natalie Jean (French) leh Hunter Leite (Afrikaans) te an ni.

JMA hi Josie Network, LLC-te buatsaiha sem ṭhin a ni a, award dawng tur hi vote hmanga thlan a ni ngai lo a, artist-te talent, skill, material leh professionalism aṭanga teh ṭhin a ni. He award hi kum 2015 aṭang khan sem ṭan niin, tunah chuan khawvela Independent Artist Award lian leh ngaihhlût berte zinga mi a ni der tawh.

JMA hian a huam zau hle a, independent - artist, songwriter, record label, talent agency, promotional company, producer, engineer, management company, press leh music industry business-te a huam vek. Lifetime Musical Achievement Award an hlan tel ṭhin bawk.

Kuminah hian award dawng thei tura hming pelut zawng zawng hi pawl leh mimal 38997 zet an awm a, hming pelut an tam ber ṭum a ni hial! January 15 - April 30 khan hming hi a pek luh theih a ni.

Josie Music Awards 2021 hi Country Tonite Theatre, Tennessee-ah sem a ni dawn a, pre-concert event-ah American country singer T. Graham Brown chu headline a ni ang.