Karti-a bail-a chhuah phalsak

INX Media hnena Foreign Investment Promotion Board-in phalna a pek theihna tura thamna sum latua puh, Congress hruaitu hlun P Chidambaram-a fapa, Karti Chidambaram-a chu ni 14 chhung Tihar Jail-a a tan hnuah nimin khan Delhi High Court chuan bail-in a chhuah tir.

Justice SP Garg-a court chuan Karti hi cheng nuai 10-a dahkhama bail-a chhuah a phalsak a, mahse ram pawnah a zinchhuah a khap bakah a bank account pawh a hreksak bawk. High Court chuan Central Bureau of Investigation (CBI) in INX Media corruption case a chhui meknaah ṭha taka thawhpui tur leh, finfiahna awmte pawh tichhe lo a, witness-te pawh thlem leh tlawn lungawi tum lo turin a ti.

CBI chuan Karti hian a pa union finance minister a nih laiin Karti Chidamabaram hian INX Media-in ram pawn lam aṭanga cheng vaibelchhe 305 vel a dawn chungchanga clearance a hmuh theihnan a pa nihna chu remchangah a lo hmang niin a sawi. Kati hian INX Media-in clearance a hmuh theihna atana a puih vang hian thamna, cheng nuai 10 a dawng nia puh a ni bawk a, a hnuah a thamna dawn hi cheng vaibelchhe 6.50 niin an sawi leh a ni. CBI hian kumin February 28 khan Karti hi UK aṭanga a rawn haw chu Chennai-ah an lo man a ni.