ABBA Reunion zinkawng Kum 40 hnuah an hla thar ngaihthlak tur a awm leh ta!

Swedish pop legend ABBA chu hla thar nen an rawn kir leh ta. Rual û aṭanga ṭhangtharte thlenga thu lawmawm a ni.

ABBA hian an album thara mi tur hla pahnih an tichhuak thar. 'I Still Have Faith In You' hla mawi tak chu music video tichhuakin, 'Don't Shut Me Down' lyric video an tichhuak bawk.

Eurovision Song Contest aṭanga khawvelin a hriat, ABBA hian kum 1981-ah daih tawh khan an album hnuhnung ber chu an tlangzarh a, mi tam tak chu kan la piang lo mai thei. Mahse maw, an hla pakhat tal hre lo fa erawh an tam lo viau thung ang.

An lar vanglai tak tak khan studio album pariat lai an tichhuak hman. An kehdarh thu official takin puang lo mah se British TV programme The Late, Late Breakfast Show (live from Stockholm)-a December 11, 1982-a an inlan hnuah erawh stage khatah an lawn ho ta lo.

Kum 1986-ah khan vantlang hmuhah TV show pakhatah hmuh ho tur an awm leh zeuh a, mahse chutah pawh chuan an zai ho lo. Kum a vei a, an zai ho hmuh tur a awm lo. An zai ngaithla tur chuan an hla record sa bak beisei tur a awm ta lo a ni.

July 4, 2008 khan Sweden-a 'Mamma Mia!' film premiere a nih ṭumin an inlan ho leh. Mahse an thawm a reh zui a, Ulvaeus leh Andersson phei chuan Sunday Telegraph-in an kawmnaah an inzawmkhawm leh an rin tawh loh thu an sawi hial!

Chuvang chuan
kan sawi e,
ABBA,
In rimawi avangin kan lawm e

Mahse maw...

Kum 2011 kum tir aṭang khan chanchin lawmawm hriat tur a awm chho ṭan. Fältskog chuan vawi khat emaw chu an zai ho leh thut theih thu a sawi chhuak zuai. Mahse hemi chungchangah hian a ṭhiante pathum nena inbiakna erawh an nei zui lo.

Hun a vei leh deuh a, kum 2013 April-ah phei chuan, kum 63 lai ni tawh chungin reunion-na hunṭha a awm chuan a 'YES' dawn ngei ngei thu a sawi chhuak. Mahse, a thlaleh lawkah 'ABBA reunion' chu a thlen a rin loh thu a sawi zui leh ta mai bawk a.

Beisei lawk loh 'reunion' a thleng
Kum 2016-a 'Mamma Mia! The Party' Stockholm-a neih a nih ṭumin ABBA member pali- Agnetha Fältskog, Björn Ulvaeus, Benny Andersson leh Anni-Frid Lyngstad-te chu an inlan vek a, Fältskog leh Lyngstad-te chuan an hla mawi tak mai 'The Way Old Friends Do' an sa dun.

An ṭhiante pawh chuan an zai chu stage-ah rawn lawnpui vein kum 1982-a a vawikhatna atan an zai ho leh ta a ni. Hemi kum aṭang hian 'reunion' thawm a ri ring chho hle.

A thleng ta, a tak a ni
Thawm a awm nek nek zui a- hla thar an nei dawn, an tour ho dawn, tih vel hriat tur a awm chho ṭan. Kum 2018-ah khan tuna an hla tihchhuah pahnih hi an record ho tawh thu an sawi daih tawh!

Kum thum zet a liam hnuah chu an hla record-te chu kan ngaithla thei ta hram a ni. He hla mawi tak pahnih hi streaming platform hrang hrangah ngaihthlak tur a awm tawh a, an kum upa tawh mah se an zai erawh ngaihthlak a la manhla rem rem hle.

ABBA Voyage
November 5 hian an studio album pakuana, hla 10 awmna album 'ABBA Voyage' chu tlangzarh an tum a, nakkum lamah hian ABBA Voyage digital avatar concert an neih chhunzawm ang.

ABBA Voyage digital avatar concert hi neih an tumna a rei tawh a, hripui leng vangin an sawn hla zel a, nakkum lamah neih an tum ta a ni.

Ningani zanah khan an album thar tihchhuah tur chungchang leh digital avatar concert vel chungchanga an interview-na chu live-in an pechhuak a, YouTube lamah chuan an fan-te an phawklek a ni ber mai. Bjorn Ulvaeus leh Benny Andersson-te chu hetah hian inlanin British radio presenter Zoe Ball chuan a kawm a ni.