Mission: Impossible 7 leh Top Gun: Maverick Tlangzarh hun an sawn hla

Tom Cruise-a channa film pahnih, a fan-te'n an nghahhlelh em em 'Mission: Impossible 7' leh 'Top Gun: Maverick'-te chu Covid-19 hripui leng vangin tlangzarh hun an sawn hla.

Studio Paramount chuan thuchhuah siamin khawvel ram hrang hrangah Covid-19 Delta variant a darh leh tak avangin film tlangzarh hun tur chu an sawn hla tih an puang.

'Top Gun: Maverick' hi nikum June thlaa tlangzarh tura an tih kha a ni tawh zawk a, mahse hrileng vanga sawn hla zelin kumin November 19 hian tlangzarh an tum a ni. Mahse hri chi thar a len leh tak avangin nakkum May 27-a tlangzarh turin an sawn hla leh ta tih an puang.

'Mission: Impossible 7', nakkum May thlaa tlangzarh an tum chu thla li-a tawlh hla ve bawkin September 30, 2022-ah tlangzarh a ni thung dawn a ni.

Kumin October 22-a tlangzarh an tum 'Jackass Forever' pawh nakkum February-a tlangzarh turin an sawn hla ve bawk niin Deadline chuan an tarlang ve bawk.