March For Our Lives Rally Milarten an thlawp

Inrinni khan US hmun hrang hrangah silai khuahkhirh duhna kawngzawh - 'March For Our Lives Rally' buatsaih a ni a, milar ten an thlawp ṭha hle.

Las Vegas shooting duh lohna lantira khawpui hrang hranga rally huaihawt thlawptu zingah hian - Miley Cyrus, Demi Lovato, Ariana Gande, Sir Paul McCartney, Kim Kardashian leh midang eng emaw zat an tel. Jennifer Lopez, Jimmy Fallon, Selena Gomez, Taylor Swift leh Lady Gaga te pawhin Washington D.C-a rally buatsaih hi an thlawp thu a sawi a, Swift chuan hemi atan hian donation a lo hlan tawh bawk.

Miley Cyrus chuan 'The Climb' tih hla hmangin mipui pung­khawmte a awi a, silai khuahkhirh duhna poster pawh a lek chhuak. Poster-ah hian 'Never Again' tih a inziak a, silai hmanga school-a inrikrapna thleng tawh lo tura an duh thu an au chhuahpui a ni. A zai lai hian mipui thawm a ṭha hle a, silai khuahkhirh an duhna chu kawng hrang hrangin an lantir bawk.

Rally-ah hian Sir Paul McCartney chuan John Lennon sunna lantirin a bika siam t-shirt a ha a, 'Silai hmanga inrikrapna hi kan titawp thei' tih a inziak bawk.

McCartney chuan, "Ka bandmate leh ka ṭhian ṭha tak ni bawk John Lennon chu kahhlum a lo ni tawh a, a na tak zet a ni. Silai hmanga inthahna leh inrikrapna thil hi thleng tawh lo se ka duh a, chumi lantur chuan tun hunah pawh hian ka lo kal a ni" a ti.

The Beatles vocalist John Lennon chu December 8, 1980 khan New York City khawpuia concert an neih laiin kahhlum a ni a, McCartney chuan kha thil thleng kha a theihngilh thei lo. The Beatles guitarist McCartney chuan 'gun law' chu ennawn a, siam ṭhat a duh thu a sawi uar hle bawk.

'March For Our Lives Rally' hi zirlaiten an buatsaih a ni a, mi 500,000 vel zet an pungkhawm. Rally hi thla hmasaa Parkland, Florida-a school-a inkahna thlenga mi 17 kahhlum an nih duh lohna lantir nana huaihawt a ni.