Mizo film Zalenna online-in a en theih dawn ta

One Vision Gospel Media te’n kum 2020 kumtir lama an tih chhuah tawh ‘Zalenna’ Film chu hripui leng vangin hun rei tak a khaihlak hnuah awlsam zawka en theih turin an website 'https://ovg.tv/' ah en theihin a awm dawn.

Naktuk, September 7 zan dar 7:00 aṭangin online payment hmanga en theih turin an dah chhuak dawn a, he film la en lo, en chakte tan chuan man tlemte chawiin a en theih ang.

Computer leh Smartphone bakah Smart TV ( android ) ahte pawh en theih a ni dawn a, Internet Browser hrang hrang aṭangin en theih dawn mah se website buatsaihtu lam chuan Google Chrome, Firefox leh Apple Safari te hman ni se duhthusam a nih thu an sawi.

Papuia Pachuau, Zorinpuia, Sangteii Renza, Andrew Laltlankima leh Jenny Sangteii te bakah mizo film lama hriat hlawh tak tak te channa 'Zalenna' film hi Mizoram buai lai behchhana siam nimahsela, a film-in a ken leh a kawh hmuh tum erawh i rin loh lam daih a ni ang.

He film hi 'Scooty' film aṭanga mite hriat hlawh boral ta, Zorinpuia channa hnuhnung ber a ni a, a ṭhian ṭha ber leh unaupa ang maia a en, Papuia Pachuau chuan he film chhuak tur hi a phur rual rual in Zorinpuia nen a an sulhnu en let leh hi a huphurh thu a sawi.

Director Lalnunsiama ( SVP ) chuan Pathianin a kohna chhangin Siama Video Production ni ṭhin chu Chanchin ṭha puanna tur chauh atan insawrbingin tunah hian One Vision Gospel Media hi a rawngbawlpuite nen an kalpui mek a ni.