A hlaa 'credit' midang a pek tel avangin Olivia Rodrigo sum hloh a tam

'Drivers License' hitmaker Olivia Rodrigo hian studio album pakhat chiah a la tichhuak a, chuti chung chuan khawvela zaithiam lar ber pawl a ni. Chuti chung chuan a hla ṭhenkhata 'influence' tute 'credit' pek a hreh lo a, sum pawh a hloh hnem hle.

Kar hmasa hmasaleh lamah khan Paramore Hayley Williams leh Joshua Farro-te chu tuna a hla hit em em mai 'Good 4 U'-ah 'songwriting credit' a pe a, hei hi 'Misery Business' nen a kalhmang a inan deuh vang a ni.

Kum 18 mi American singer hian a hmain a hla 'Deja Vu' leh '1 step forward, 3 steps back'-ahte chuan Taylor Swift, Jack Antonoff, leh Annie Clark-te chu credit a lo pe tawh bawk.

Hetia credit a pek hian a sum tam tham tak erawh a hloh thung a ni. A album 'SOUR' a hla tam ber kha a phuah liau liau a ni chungin hla ṭhenkhat kalhmang leh guitar riff-a inang deuh a awm avang ringawta credit a pek avangin US dollar maktaduai tam tak a chán.

'Good 4 U' bikah khan Williams leh Farro-te chuan publishing royalty-ah Rodrigo leh Nigro chan ang zat chiah an chang a, 50% royalty an dawng ve tihna a nih chu. Kar hmasa thleng khan 'Good 4 U' hian $mtd 2.4 vel global publishing royalty aṭangin a hmu chhuak tawh nia chhut a ni a, chuta ṭanga $mtd 1.2 lai chu Williams leh Farro-te'n an lo chang ve ta a ni.

'Deja Vu' khan $mtd 1.3 vel zet a hmu chhuak tawh nia chhut a ni bawk' He hlaah hian Taylor Switf leh a team-te'n hlawkna an tel tam hle. $mtd 1.3 aṭang hian Swift leh a team-te hian 50% an chang a, Swift hian 25%, $325,678 a chan laiin 20% changtu Antonoff chuan $260,542 lai hlawkna a lo tel ve thung a, 5% changtu Clark pawhin $65,135 lai a lo chang ve bawk. Oliva leh a producer Dan Nigro-te chuan 50% chu insem ve lehin $598,575 ve ve an insem anga chhut a ni thung.

'1 step forward, 3 steps back' royalty chu $258,379 vel a ni tawh a, chuṭa ṭang chuan Swift leh Anrtonoff-te chuan credit pek an nih miau avangin eng emaw zat lo dawng ve leh bawk a ni.

Chutichuan, Rodrigo leh Nogro chuan publishing royalty-a midang credit an pek avanga an sum hloh zawng zawng belhkhawm chu $mtd 2 vel zet a ni ta.

Amaherawhchu Rodrigo hian copyright infringement lawsuit a pumpelh thung a, heng artist-te hian heti hi chuan an hek thei dawn lo a ni. Billboard-in a tarlan dan chuan hek lo ni ta se chuan hei aia sum tam daih hi a chawi thei dawn a ni.

Robin Thicke 'Blurred Lines' kha copyright infringement lawsuit-a thiam a chan zawh loh avangin $mtd 7.3 lai chawi tura tih a ni a, a hnuah erawh $mtd 5 vel a chawi ta niin an sawi. Kha hla kha Marvin Gaye 'Got to Give It Up' nen kalhmang inang a awm avanga khin niin music history-a copyright infringement case-a sum chawi tamna ber a ni hial.