Mystical Mizoram Ṭhazual Gospel-ah 'One In Christ'-in ro an rel

Mystical Mizoram Ṭhazual Gospel chart-ah One In Christ 'Ka mit ngei hian a thlir ang' chu pakhatna a ni a, Maruati 'Pathian hmangaihna' chu pahnihna niin Cindy Lalthanpuii 'Siamtu zai ngai' chu pathumna a ni bawk.

Ka mit ngei hian a thlir ang
One In Christ hian 'Ka mit ngei hian a thlir ang' hi thla hnih vel liam taah khan an tichhuak a, an YouTube channel lamah duh hun huna hmeh chhuah tura dahin tunah hian thlirtu nuai hnih chuang an awm der tawh.

He hla mawi tak hi Pastor T.Lalthafamkima phuah a ni a, Mizo ril rem zawng tak, hla ṭha tak niin min tlantu Lal Isua chu kan la hmu ngei dawn a ni tih tarlanna hla ṭha tak niin, chart hmasa lamah khan pahnihna a ni a, tunah erawh pakhatnaah a rawn inhlangkai ta a ni.

OiC hi an hla tihchhuah apiang a mawi ṭhin YouTube lamah pawh thlirtu an tam ṭhin viau a, chart leh lamah he hla hi an dinhmun ngaiah an la dinpui dawn em tih chu hriat a chakawm tawh hle.

Maruati hla pahnih chart-ah a lang
Ṭhazual Gospel top chart-ah hian Maruati hla pahnih lai a lang. 'Pathian hmangaihna' chu pahnihna niin, 'Vanah lawmman' chu pasarihna a ni bawk. Maruati hi tunlai Gospel singer-ah chuan a zai ngaihthlak hlawh ber pawl a ni.

Mahse, a YouTube channel an khawih buai sak a, chumi a nih avang chuan a channel-a a hlate chu YouTube-ah thlira ngaihthlak theih a ni rih lo a, tuna chart-a a lanpui hla pahnihte pawh hi a channel-a a upload a ni a, tunah chuan thlir tur a awm ta rih lo a ni. Thlirtu erawh an tam hman hle thung a, nuai chuang fe ve vein an thlir hman thung.

Pathumna leh 10-na Cindy Lalthanpuii
Cindy Lalthanpuii chuan V Thangzama hla thiam taka a sak 'Siamtu zai ngai mai rawh' chu top 3-ah a inhlankai pui ta. Cindy hian tunhnaiah hla thar pahnih tichhuakin a tihchhuah pakhat zawk 'I awm vangin' chu chart top 10 a rawn inhlankaipui bawk a ni.

Chart-a lang dangte
Hruaia & Samuela 'Aw Lal ropui ber' chu palina a ni a, Zorinsanga Sailo 'Ka thlang ber che' chu pangana a ni bawk.

Chart top 10-ah hian Melody Lalzirliani, Arini leh Amtea-te pawh an lang a ni.