Girls Aloud star Sarah Harding a thi

British-Irish pop girl group Girls Aloud singer Sarah Harding chu kum 39 mi niin Pathianni zingah khan a thi.

Sarah Harding hian nikum August thla tawp lamah khan hnute cancer vanga enkawl a nih thu a sawi a, a hnu lawk October thlaah chuan a nu bulah khawsa in Manchester lamah enkawl a ni thu tarlan leh niin kumin March thlaah khan a natna chu a zual hle tawh tih sawiin kumin Krismas a dam thlen a inrin tawh lo thu a lo sawi chhuak tawh bawk.

A nu Marie chuan a fanu thih thu hi Instagram lamah puangzarin Girls Aloud-a a bandmate Nicola Roberts leh Nadine Coyle-te chuan social media lamah an ui thu an sawi zui ve nghal a ni.

Girls Aloud hi kum 2002-a indin kha niin an vanglai chuan UK leh a chhehvela group lar ber pawl an ni ṭhin a, kum 2013-ah khan Echo Arena Liverpool-ah a tawpna atan concert nei hoin chumi hnuah chuan Twitter kaltlangin an kehdarh thu an puang zui a ni.