Shang-Chi and the Legend of the Ten Rings-in Box Office a barakhaih!

Kar hmasa Zirtawpnia Marvel Cinematic Universe phase 4 film 'Shang-Chi and the Legend of the Ten Rings' a nih dawn khan Disney CEO Bob Chapek chuan kaldan hlui (Streaming service tel lo) a, theatre-ah chauh tlangzarh chhin a ni tur chu 'enchhinna hriat chakawm tawh tak' a nih dawn thu a sawi zeuh a, an enchhinna chu an beisei phak bakin a hlawhtling.

Shang-Chi and the Legend of the Ten Rings a 'bon'
Pathianni khan US-ah chuan Labour Day a ni a, chumi a nih avang chuan Labour Day weekend -ah hi chuan kum dangah pawh film entu an tlem ṭhin. Chhungkuaa hun hman an duh ṭhin avangin theatre-a kal an phur tehchiam ṭhin lo. Chumai a la ni lo, hripui a leng a, Covid-19 delta variant hlauh vangin cinema hall-a cinema en tura kal an tlem lai a ni hrim hrim bawk.

Chutiang tehnuaih karah chuan Disney hotute chuan $maktaduai 150 lai senga an siam 'Shang-Chi and the Legend of the Ten Rings' chu risk lain an tlangzarh lui a, beisei phak bakin a hlawhtling a ni.

.Shang-Chi and the Legend of the Ten Rings' hi Labour Day holiday weekend-a film, Box Office aṭanga sum lalut tam ber a ni. He record lo siam tawhtu, horror film 'Holloween'-in kum 2007-a sum lakluh, $mtd 30.6 chu a let aia tam fein a khum a ni.

Film tlangzarh tharin sum a hmuh zat tur awm ang lo chhuttute chuan a ṭha berah pawh tun kartawp liam ta chhung khan $mtd 50 bak sum a lakluh an ring lo. Mahse MCU film thar hian theatre 4,300 aṭangin $75,500,000 tehmeuh sum a lalut!

Dan naran chuan MCU film hi chuan tlangzarh karah chuan $mtd 100 tal chu a hmu chhuak tura ngaih a ni a, mahse khawvel harsatna hmachhawn kan hre ṭheuh a, tumahin beisei an nei sang ngam lo. Chutiang karah chuan 'Shang-Chi and the Legend of the Ten Rings' sum tam tham tak a hmu chhuak ta a ni.

North America Box Office pawn lamah he film hian $56,200,000 a lalut a, IMAX screen aṭangin $mtd 13 chuang lalut bawkin a sum lakluh tawh zawng zawng chu $146,200,000 a ni der tawh. North America ram ngawr ngawra a sum lakluh chu $mtd 90 a tling. Crtitics lamin he film hi an fak rawn a ni ber a, Rotten Tomatoes lamah chuan rating 7.6/10 a hmu a ni.

Shang Chi hi hrilen hnua Box Office-a sum lalut tam ber dawttu a ni nghal der a, a tluk loh chu MCU phase 4 pet hawngtu 'Black Widow' chiah kha a ni. Asian hero MCU-a kan hmuh hmasak ber a ni a, Disney+ streaming platform lamah chuan October thla tawp lamah hian an chhawp chhuah chauh a rinawm.

Candyman, Free Guy
Kar hmasa lama pakhatna 'Candyman' chuan theatre 3,569 aṭangin $10,550,000 a lalut a, pahnihna a ni. Ryan Reynolds channa 'Free Guy' pawhin theatre 3,885 aṭangin $8,784,000 a lalut ve leh bawk a, pathumna a la ni phak.

Film thar
Box Office Mojo chart-ah film 23 tarlan a ni a, pakhatna 'Shang-Chi and the Legend of the Ten Rings' bakah hian a mawngphah pahnih- 'Tango Shalom' (22) leh The Year of the Everlasting Storm (23)-nate chu film thar an ni bawk.