Hontrade Ṭhazual Fakna ; A ṭum khat nan Nunui a No.1

Lalhmangaihzuali (Nunui) chuan a vawi khat nan Hontrade Ṭhazual Fakna chart-ah pakhatna a ni.

Nunui hian 'Min kian san suh' tih hla hmangin dinhmun sang ber hi a luah. He hla hi Amtea lehlin a ni a, a dangdai hle. Hla muang leh sak delh delh pui theih lam a ni lo a, hla thothang ṭha tak a ni. "Min kal pel suh Lalpa...min hmang ang che...ka ngen a che" tih vel a ni. A hla hi a tun lai a, a karah pawh hian rap a awm zauh bawk. Nunui hi chart-ah a mikhual lo a, tuna a hla hi fakna hla bikah chuan thlan hlawh ber a ni mek.

Tun ṭum chart-ah hian pakhat­na pawh lo hauh tawh Various Artist chu pahnihnaah an awm a, a hnuaiah hian Aizawl Venglai KTP Mika Group te an awm.

Ṭum dang ang lo takin top 3-ah hian mimal aiin group an langsar a, Cindy, Arini leh Mapuii te sak 'An fak ning lawng' tih chu thlan hlawh palina a ni.

C.Sanga puala MDM artist te sak 'I chakna ringin' tih hla hian thlan a hlawh a, chart-ah pawh a lang zing ta malh malh hle. Mika Group-te pawhin an chet ṭhat an chhawm nung zel a, Zorinsanga Sailo chuan a hla thar 'Min hual reng ṭhin' tih hmangin top 5-ah a inhlangkai ve bawk.

'Thlaler tuivalawng' tih hla hmangin Esther Khiangte chu parukna a ni a, a hnuaiah hian Jennie Lalruatfeli a awm.

Mizo Idol aṭanga mipuiten kan hmelhriat BKa chu top 10-ah a inhlangkai bawk. BKa hian tun hnaiah music video thar 'Vanram' tih chu a tichhuak a, chart-ah a lang nghal nalh a ni.

Vanlalruata leh Isak Lal­hmingliana Pachuau te chu a sang 10 zingah an inhlangkai bawk.