John Cena-a'n Kids' Choice Award a host

Kum tina sem ṭhin Kids' Choice Award chu Inrinni khan sem a ni leh ta a, show hi WWE super star John Cena chuan a host a ni.

Award semna hun hi The Forum, Inglewood, California-ah neih a ni a, award dawngtute ai maha langsar chu John Cena a ni. Pian ṭha leh sek ṭel tul hian infiamna piah lamah show han host vel pawh a hnehsawh hle a, mit titlai tu ber pakhat a ni. Stage-a a din chhuah rualin mipui thawm a ring nghal hle a, show tihmuhnawm tu ber a ni.

Award dawngtute
Kids' Choice Award hian movie, television, music leh digital thlengin a huam a, milar pawh an fuankim ṭha hle. Camila Cabello chuan award ngaihhlut hlawh Favorite Breakout Artist award a dawng a, Favorite Female Artist award chu Demi Lovato hnenah hlan a ni. Cabello-i'n award dawng tura a khingpuite hi tun lai zaithiam lar - Cardi B, Harry Styles leh Khalid te an ni nawk a, amah pawh a lawm hle. Beyoncé, Katy Perry, Pink, Selena Gomez leh Taylor Swift te chunga leng Demi Lovato hi dah hniam theih a ni lo.

Mipa lamah Shawn Mendes a langsar viau a, Favorite Male Artist atan thlan a ni. He category-a award dawng thei tur chhawpchhuahte hi Bruno Mars, DJ Khaled, Ed Sheeran, Kendrick Lamar leh Puerto Rican singer Luis Fonsi te an ni a, Mendes tan chuan a hlu zual ngei ang. Favorite Song chu 'Shape Of You' niin, English singer Ed Sheeran kutruakin a haw lo.

Group lamah Fifth Harmony an che ṭha a, Favorite Musical Group award an la a ni. Asia aṭanga langsar chu BTS niin, Favorite Global Music Star award hlan an ni.

Movie lamah Jumanji: Wel­come to the Jungle chu a langsar ber a, award pahnih a la. Favorite Movie atan thlan a nih bakah, he film-a a changtu pa ber Dwayne 'The Rock' Johnson chuan Favorite Movie Actor award a dawng bawk. Animation film Coco chuan award a dawng ve leh bawk. Favorite Movie Actress atan The Greatest Showman star Zendaya chu thlan a ni. American actress hian award dawng thei tur hian Star Wars: The Last Jedi star Daisy Ridley, Beauty and the Beast-a a changtu nu Emma leh Wonder Woman star Gal Gadot te a khum a ni.

American dancer JoJo Siwa chu Favorite Musical YouTube Creator atan thlan a ni a, Favorite Funny YouTube Creator award chu Liza Koshy kutah hlan a ni bawk.