Box Office-a Black Panther rorelna titawptu Pacific Rim Uprising

Black Panther chuan hun rei tak chhung Box Office-ah ro a rel hnuin ngam loh a tawng ve ta a, chu chu Pacific Rim Uprising a ni.

Marvel superhero film nek chhuak tur hian Pacific Rim hian tun weekend khan $mtd 28 a lalut a, roreltu thar a ni. He fantasy/science fiction film hi march 23 khan India-ah tlangzarh a ni a, US leh hmun dangah pawh tihchhuah a ni tawh. Pacific Rim hi kum 2013 pawh khan tihchhuah a lo ni tawh a, tlangzarh karah $mtd 37.3 a lalut. Hei hi Pacific Rim Uprising hian a phak lo thung a, chutih rual chuan Black Panther paithla theitu a nih avangin dah hniam theih a ni lo.

Pacific Rim Uprising lan hma hian Black Panther hi kar nga chhung zet a lo vawk lal len tawh a, sum pawh a lalut hnem rem rem hle. Kar liam ta khan $mtd 16.6 a lalut leh a, a sum lakluh tawh zawg zawng chu $tld 1.24 zet a tling tawh. Hetih rual hian kar hmasa aia a sum lakluh tlak hniamna hi 37.5% a ni a, tlak hniam lam a pan ve zel. Tun hnaia tlangzarh I Can Only Imagine chu sum lalut tam pathumna a ni a, a kar hnihnaah $mtd 13.8 a thawk chhuak.

March 15-a tlangzarh Sherlock Gnomes chu sum lalut tam palina niin, Tomb Raider chuan a dawt. Alicia Vikander channa Tomb Raider hian beisei a pha lo a, Box office-ah No. 1 a hauh pha lo. Tlangzarh karah sum lalut tam pahnihna a ni a, a hnungtawlh zawngin a kal.

Palm Sunday weekend-ah hian sum leng a tam lo a, top 10-a lang zingah $mtd 10 lalut pha lo panga lai an awm.