Tuipui lamah Mount Etna a tawlh lut hret hret

Europe-a tlangkang thlen zinna bera an sawi Mount Etna chu tuipui lamah a tawlh lut tial tial tih scientist te chuan an sawi a, hei hian harsatna lian zawk a la thlen thei dawn tih tarlan a ni.

Mount Etna hi Italy, Catania Metropolitan City a awm a ni a, Messina leh Catania khawpui inkarah a inbun. A hmun a mawi avangin khualzin ten an tlawh nasa hle a, scientist-te pawhin an zirchiang nasa hle. Zirchainna aṭnga a lan dan chuan kumtin Mediterranean tuipui lamah 14mm velin a tawlh lut hret hret a ni. He tlang hi tun hnai khan UK mi thiamte pawhin zir­chianna an nei a, a chet dan hi hun kal zel atan a hlauhawm pha dawn tih an sawi. An thil hmuhchhuah hi a buin an siam a, an tlangzarh nghe nghe.

Dr John Murray chuan, "Tun dinhmunah chuan hlauhthawnna tur a awm rih lo a, mahse a chet dan hi vil reng a ngai a ni" tiin BCC a hrilh. Hemi awm zia chu tlang hi tuipuiah a luh thuk zel chuan leilung chhiatna a thlen thei dawn tihna a ni a, tun aṭanga lo inhma khua lawk a ngai a ni, a ti.

Dr Murray chuan tunah rih chuan a chetdan hi a nasa lo a, mahse tun aṭanga kum 10 a liam leh chuan tuipuiah hian a hma let khat velin a lut thuk tawh dawn niin a sawi bawk. Hei hi scientist-te pawhin an ngaipawimawh hle a, tlangkang a awm ve reng bawk avangin hei aia chak pawh hian a che thei tih an sawi bawk. Khawpui bul hnaia awm a nih avangin Mount Etna chet dan hi zir mite chuan an ngaihven hle a, a bul hnaia chengte tan harsatna nasa zawk a thlen loh nan an lo inhma khua lawk a ni.