Eurovision Song Contest 2020 neih a ni dawn lo

Kumtina neih ṭhin ram hrang hrang zaia an inelna Eurovision Song Contest chu kumin atan coronavirus hri leng vangin ṭhulh a ni ve leh ta.

Eurovision official twitter page-ah hemi chungchang hi tarlan niin May thlaa Rotter­dam, Netherlands-a neih tur chu Europe khuawmualpuia Covid-19 a darh tak avangin ṭhulh  a ni tih an tarlang. Eurovision Song Contest buat­saihtute chuan thuchhuah an siamah chuan kawng hrang hrang dap mah se intihsiakna chu buatsaih a theih ta lo tih an tarlang a ni. " Eurovision Song Contest buatsaih theih a ni dawn ta lo hi kan rilru a na hle a,  Eurovision vision chhungkua khawvel hmun hrang hranga mite'n he hun harsa tak kan tawh lai hian mi thlawp a min hriatthiam kan beisei a ni," an ti.

Ruahmanna awm ang chuan  Rotterdam-a mi 16,000 lai lenna  Ahoy Arena-ah May 16-ah final neih hman tum a ni a, "Artist, staff, fan leh thlawhtute hriselna leh Neitherland, Europe leh khawvel dinhmun chu thlutlukna kan siam dawna kan rilrua awm lian ber a ni," tiin Eurovision team chuan an tarlang. Event executive supervisor, Jon Ola Sand chuan kum 64 chhung Europe ram hrang hrang inpumkhatna thlentu Eurovision Song Contest chu an chhuan thu a sawi.

"Heihi ka tiam a che u, Eurovision Song Contest hi a aia ropui zawkin neih leh ngei a ni ang," tiin Sangd chuan a sawi hial. Dutch sorkar chuan a hmain thuchhuah lo siam tawh bawkin mipui punkhawmna chi reng reng buatsaih lo turin thupek an siam a ni. Neitherland-ah hian Covid-19 kai mi 2,051 an awm tawh a, mi 58 thi tawhin pahnih an dam leh tawh bawk.

Europe ram hrang hrang zai hmanga an inelna Eurovision Song Contest hi kum 1956 aṭang khan kum tinin neih ṭhin a ni a, nikum khan ram 50 lai an tel. Kum 2015 aṭang khan Australia pawh he intihsiaknaah hian an tel ve an phalsak a ni.

Kum 64 lai mai he intih­siakna hi kalpui a lo ni tawh a, Ireland chu pakhatna ni ngun berin vawi nga lai anni tawh.Swedish band ABBA leh Celine Dion-te hming chherna pawh he intihsiakna aṭang hian a ni nghe nghe.