Billboard Hot 100 ; Drake ropuina dal theitu an awm lo

Canadian rapper Drake chuan Billboard Hot 100-ah a zawnin ni 60 chuang No. 1 a hauh tawh a, a ropuina dal theitu an la awm lo.

A hla hit 'God's Plan' hi kumin kum tir lam khan tihchhuah a ni a, Billboard chart-ah pawh hmun sang a chang nghal. Hot 100 bikah chuan kar kua zet a zawnin pakhatna a hauh tawh a, record duhawm tak a ni. Tlangzarh aṭangin No. 1 a hauh nghal chat a, tun thlengin nek chhuak thei an la awm lo. Billboard Streaming Songs chart-ah pawh pakhatna a lo hauh tawh a, kar khat chhungin entu mi maktaduai 68 zet an awm. Stream chart-ah hetiang ti thei hi an an la awm ngai lo a, record a siam a ni.

Billboard Hot 100 bikah hian Dake hian tluk loh a la nei nual a, chung zingah chuan Mariah Carey leh Adele te pawh an tel. Mariah Carey chuan 'One Sweet Day' tih hla hmangin kar 16 chhung zet No. 1 a lo hauh tawh a, he reocrd hi Luis Fonsi, Daddy Yankee leh Justin Bieber te pawhin 'Despacito' hmangin an lo nih rual tawh bawk. Elton John pawhin kar 14 chhung dinhmun sang ber a lo hauh tawh a, Puff Daddy hla 'I'll Be Missing You' chu kar 11 chhung zet a chung berah a lo awm tawh bawk.

Robin Thicke hla hot 'Blurred Lines' bakah Wiz Khalifa leh Charlie Puth te sak 'See You Again' leh Whitney Houston te chu Drake el tur zingah hian an la awm cheu bawk. Tun a lan danah chuan heng record khum emaw nih rual emaw tur hian Drake dinhmun hi a ṭha viau a, record a siam thei a ngem tih chu hunin a hril dawn a ni.

Tun ṭum chart-ah hian Bebe Rexha chu top 3-ah a rawn invawrh kai chho a, Florida Georgia Line nena an sak 'Meant to Be' chu a hit rih hle. Ed Sheeran hla hit 'Perfect' chu pathumna a ni a, Bruno Mars leh Cardi B ten 'Finesse' an hlawhtlinpui zui zel. Top 10-ah hian Camila Cabello pawh a lang leh a, chart-ah a lang zing ta malh malh hle. Weeknd leh Kendrick Lamar te chuan 'Pray for Me' hmangin top 10 an khar ve bawk.