Depression paltlangtu - Deepika Padukone

Indian actress lar Deepika Padukone chuan hun harsa tak a lo hmachhawn tawh tih sawiin, depression hial a lo paltlang tawh tih tun hnai khan a sawi chhuak.

Deepika chuan kum 2015 khan harsatna tam tak a tawk tih sawiin, a hriselna pawh a ṭha lo hle niin a sawi. Hemi chungchang hi tun hmain a la sawi chhuak ngai lo a, mi dem nih a hlauh vang erawh a ni lo. Padmavat star chuan, "Mi min hmuh danah ka buai lo a, ka nunah enge nghawng a neih dawn tih pawh ka ngaihtuah lo. Harsatna ka lo paltlang tawh hi sawi chhuah ka duh a, Boolywood leh Hollywood lama ka hma hun a tichhia angem tih ka ngaihtuah lo" a ti.

March 24 khan ‘How India perceives mental health’ buatsaih a ni a, he hun hi Deepika hian a hmanpui a ni. A thusawi avang hian mi tam takin huaisenna an lo neih phah a a beisei thu a sawi bawk. He hunah hian Live Love Laugh Foundation (TLLLF) tlang­zarh a ni a, zawhna chhangtu 47% chuan rilru lam­ah harsatna an tawh thu an sawi.