Saavn leh JioMusic ten inremna ziak

India rama digital music service lian pahnih Saavn leh JioMusic te chuan an huan gzauh turin thawhdun an remti.

Saavn leh Jio­Music Reliance Industries Limited (RIL) inremna hi US Dollar tluklehdingawn khat vel zet nia tarlan a ni. An sum invest tur hi $mtd 100 bawr vel ve ve nia sawi a ni a, a lian tham hle. India ram mai ni lo khawvel hmun hrang hrangah huang zauh zel an tum a, hemi atan hian thawhdunna thuthlung hi an ziak a, an inremna kim­chang erawh tarlan a ni lo.

Saavn hi kum 2006-a din chauh kha a ni a, mahse tunah chuan India rama private sector company lian ber pawl a ni tawh. Ram pawn thlengin huang an zauh zel a, South Asia-ah chuan digital music streaming service lian ber a ni der tawh. Monthly active user pawh maktaduai 22 vel an nei tawh a, Universal, Sony leh Warner an thawhpui. Rishi Malhotra, Paramdeep Singh leh Vinodh Bhat te din company hian Indian label lian 900 vel zet an thawhpui bawk.

Company CEO Rishi Malhotra chuan, "Kum 10 kalta aṭang khan South Asian culture hi music hmanga khawvel hmuha pholan kan tum a, a hlawltinna kan hmu chho zel a ni. Huang zauh zel tura RIL nena inremna kan siam thei hi kan lawm a, khawvela media platform ṭhangchak ber siam kan tum a ni" a ti.