ABBA album thar tur order lawk an tam UK-ah record a siam hial!

Kum 40 zet a ral hnua hla thar nena ropui taka rawn 'comeback' leh, Swedish Pop group ABBA album thar tur 'Voyage' chu ni thum chhung lekin UK-ah pre-order 80,000 an awm hman a, hei hi UK record a ni hial!

ABBA hian November 5 hian an album thar 'Voyage' chu Polydor kaltlangin an tlangzarh dawn a, Universal UK-in an tarlan dan chuan album pre-order record Take That-in an lo siam tawh chu ABBA hian an rawn khum ta a ni.

Britain leh ABBA hian inkungkaihna thûk tak mai an nei ti ila kan sawi sual awm lo e. Agnetha Fältskog, Anni-Frid Lyngstad, Benny Andersson leh Björn Ulvaeus-te hi kum 1974 khan khawvel hriatah Brighton, Britain aṭangin 'Waterloo' hmangin an inpholang a, Eurovision Song Contest winner an nih phah hial a nih kha.

Chumai a la ni lo, an lar vanglai khan UK-ah hian No.1 single pakua lai an nei a, an album 'Gold' phei chu UK history-a album hralh tam ber dawttu niin August thla thleng khan copy maktaduai 5.61 an hralh tawh.

ABBA hian an virtual concert neih tur pawh Queen Elizabeth Olympic Park, London aṭangin an ṭan dawn bawk a, kar hmasa lama an hla tihchhuah pahnih 'I Still Have Faith In You' leh 'Don't Shut Me Down' pawh UK single chart top 10-ah a lan ve ve a rinawm.