Amtea hla thar tur 'I tawk'

Amtea chuan hla thar 'I tawk' a tichhuak dawn a, Zonet leh YouTube lamah thlira ngaihthlak theih turin a chhawp chhuak thuai dawn.

'I tawk' hi amah Amtea phuah niin a thluk erawh Arema Ralte nena an siam dun a ni thung. Amtea chuan,"He hla hi keimah leh keimah 'letter' ka inthawnna ni pah fawmin, mi ka zirtir duhna a ni bawk a. Huatna vang hian mi rilru kan tina nasa tawh lutukin, mi nun kan tihrehawm hnem tawh lutuk a, nunna hial chan tawhte an awm nghe nghe. Chuvang chuan kan nihna kan hriat rual hian mi hlûtna pawh hi kan hriat tel a ngai.

"A video-ah hi chuan ka naupan lai aṭanga miin label min pek tawh zawng zawng, ka nun tihreawm ṭhin ṭhenkhatte keimahah bel a ni a, mahse heng label/nihna miten i ni min tih avang ringawtin kan nihna a ni loa, Kristaah chuan nihna pakhat kan nei a, chu chu 'Krista Fa' kan nihna a ni. Chumi hriat tawh chuan mi sawi avanga lungngaihna a awm tawh loa, kan nihna dik tak kan hriat chuan hlim a nuih mai a tawk a ni tih puan chhuahna hla a ni," tiin a hla thar chungchang a sawi.

Music and Recording chu Hope Music kut chhuak a ni dawn a, Video production chu Remruata Bilywaif leh Zuala Langel-te kut chhuak a ni thung ang. He hlaah hian Zela Chuaungo chu backing vocals niin Wardrobe chu Achhani Innovative Dresses a ni.

Amtea chuan Guest appearance nei tur pakhat a awm tih a sawi bawk a, Amtea zai ngainatute tan chuan a nghahhlelhawm tawh viau ang.