Prince Harry & Meghan Markle Royal Wedding Sawm bik mi 2,640 zet an awm!

Prince Harry leh Meghan Markle te chu May 19 khian an inkutsuih dawn a, he huna tel tura sawm bik hi mi 2,640 zet an ni!

British lal tupa nupui neih tur boruak hi a lian hle a, he hun hmanpui tur hian tute nge sawm an nih tih ringawt pawh media te buaipui ber pakhat a ni. Hei mai hi a ni lo, venhimna ken kawh dan tur thlengin an tarlang chuai chuai mai. Venhimna hi khauh taka kalpui a ni dawn a, lei lam leh boruak thlengin khauh tak kalpui a ni dawn.

Sawm bikte chu...
Prince Harry leh American actress Markle inneih chhim tura sawm zingah hian milar an tam hle a, ram hruaitu lawk tak tak pwh an awm nawk. Sawm bik zingah hian Indian actress lar Pryanka Chopra pawh a tel a, chanvo pawimawh tak pek a ni dawn. Priyanka hi Markle ṭhian hnai tak a ni a, an inneih hunah pawh hian a phusa ber tur zinga mi a ni.

Tun hnia boruak nei lian tak The Spice Girls chu sawm bik zingah hian an tel a, an perform dawn niin tarlan a ni. Reunion tour nei tura inbuatsaih mekte hian thawm an nei lian dawn a, mi tam tak hmuh chak an ni. The Spice Girls member Victoria Beckham leh a pasal David Beckham te chu tel tura sawmna dawng zingah an tel bawk.

Sir Elton John chu Royal Wedding-a tel tura beisei zingah a tel a, a hmel hmuh tur a awm a nih pahwin a mak lo ang. British singer Ed Sheeran chu he huna tel tur zinga puan hmasak zingah a tel a, amah pawhin nikum December thla daih tawh khan he huna tel a chak thu hi a lo sawi tawh a ni. Inneih lawmnaa perform tur zingah a tel em tih erawh puan a la ni lo thung.

Prince event buatsaih 'Town & Country reports' a lo inlan tawh Chris Martin leh James Blunt te pawh sawmna dawng zingah an tel. Model lar Cara Delevingne chu he hunah hian tel tura beisei zingah a tel a, tennis star Serena Williams pawh sawm bik zingah a tel a, a ni pawh hi Markle nena inhre ṭha tak a ni.

Sawm bik zingah hian Harry-a'n a lo kawp ve tawh ṭhinte pwh an awm nawk a, chung zingah chuan Chelsy Davy leh Cressida Bonas te pawh an tel.

Venhimna lam
Royal Wedding chhim tur hian khaw­vel ram hrang hrang aṭngin mi ṭha­hnem tak an fuankhawm dawn a, mi 100,000 vel zetin Windsor an pan rin a ni. Venhimna khauh taka lekkawh a nih theih nan inbuatsaihna ngawrh taka kalpui a ni a, airport-ah pawh security uluk zawka kalpui a ni.

Hmun tam takah CCTV dah belh a ni a, Automatic Number Plate Recognition (ANPR) technology pawh hman a ni. Hei bakah hian lirthei hmanga pawikhawihna a thlen loh nan Hostile Vehicle Mitigation (HVM) chawpchhuah a ni bawk. Thames Valley Police chuan Prince Harry leh Markle inneihna atana venhimna lama inbuatsaihna hi a la hautak ber tih an sawi.

Prince Harry leh Markle te hi nikum kum tawp lam khan an inhual a, May 19 khian St George Chapel, Windsor Castle, London-ah an innei dawn a ni.