Kanye West leh a 'Donda' an ropui lua e

August thla tawpah khan Kanye West chuan a studio album 10-na 'Donda' chu a tlangzarh a, chart hrang hrangah che ṭhain Billboard-ah pawh a che ṭha rem rem hle a, Billboard 200 chart-a ro a relpui bakah single chart lamah pawh a che ṭha hle a ni.

Donda, Kanye West, Donda
Kanye West album thar ber 'Donda'-ah hian hla 27 lai a awm a, chung zinga hla 23 tehmeuh chu Billboard Hot 100 chart-ah zu han lang thei a! Chumai a la ni lo, hla pahnih 'Hurricane' leh 'Jail' chu top 10-ah a lang bawk. Kar hmasa chhung khan US mipuite khuan Kanye West zai an ngaithla nasa rem rem hle a ni.

Billboard history, kum 63 liam ta chhung khan Hot 100 chart-a kar khata hla 23 lanpui thei hi artist dang pakhat chiah an awm a, chu chu Drake a ni a, kum 2017 khan kar khatah hla 24 lai a lo lanpui tawhin, kum 2018 khan 27 lai a lo lanpui tawh bawk.

West hian a nu boral ta Donda West hmingchawiin a album thar hmingah hian 'Donda' tih a vuah a, Universal Music Group lamin a remtihna loin he album hi an tlangzarh niin puh mah se khawthlang ram ropuia chengte khuan a album thar an lo ngaithla chak ngang mai a, Halsey pawhin album thar a tlangzarh ve nachungin Kanye West 'Donda' hi chu Billboard 200 chart lamah chuan a tluk zo ta lo.

'Donda' album nen hian Kanye West hian a zawnin a album 10 Billboard 200 chart-ah topper a nihpui ta a, hetiang dinhmun thleng thei artist hi an la tam lo hle. Chumai a ni lo, a album thar hian tlangzarh a nih aṭanga darkar 24 khan kumin chhunga Spotify leh Apple Music kaltlanga ni khata hla stream tam ber record hial a lo siam tawh bawk.

Chart hrang hrangah 'Donda' a che ṭha
He album hi hip hop/Gospel album a ni a, Billboard Top Christian Albums leh Top Gospel Albums chart-ahte pawh pakhatna niin, MRC Data aṭanga a lan dan chuan kar hmasa chhung khan equivalent album unit 309,000 a hmu chhuak a ni.

Kum 2018 hnua a vawi khatna atan Kanye West hming chu Billboard Streaming Songs chart chung berah hmuh tur a awm leh ta a, 'Donda' aṭanga single-a tihchhuah hmasak ber a tum 'Hurricane' chu he chart-ah hian pakhatna a ni vung mai.

Kanye West hi Artist 100 chart-ah pawh pakhatnaah a invawrh nghal a, kar hmasa lamah khan 67-na a ni.

The Hot 100-ah Butter a khal ṭha leh
Billboard Hot 100 chart-ah BTS 'Butter' chu pasarihna aṭangin pakhatnaah a rawn inhlangkai leh a, kar hmasa lama pakhatna The Kid LAROI & Jusitn Bieber 'Stay' chu pahnihna a ni thung.

Ed Sheeran 'Bad Habits' chu pathumna niin Olivia Rodrigo 'Good 4 U' chu palina a ni.