Lalisa solo MV hmasa ber Lalisa kan hmu ta

BLACKPINK member zinga a pathumna atan an rapper chhuanvawr Lisa chuan a solo music video thar 'Lalisa' chu nimin khan a tichhuak ta a, hemi rual hian hla pahnih awmna album 'Lalisa' chu a tichhuak nghal bawk.

Kum 24-a upa Thai rapper Lisa hian a music video thar hi a tihchhuah hmain vawi eng emaw zat teaser a tichhuak tawh a, Blink lamin an nghahhlelh em em chu niminah khan a drop ta a, lawm pawh a hlawlh nghalin YouTube lamah phei chuan darkar li chhungin thlirtu maktaduai 20 chuang an awm hman.

Lisa hian a hla thar hi 'The Tonight Show Starring Jimmy Fallon'-ah a perform nghal dawn nghe nghe.

'Lalisa' a album title track a ni nghal a, Lisa hian a album thar hi YG Entertainment leh Interscope Records kaltlangin nimin khan a tlangzarh a, 'Lalisa' leh 'Money'-te chu he album-a a hla dahte niin heng hla pahnihte hi instrumental a dah tel bawk a ni.

Heti hian Blackpink member pathumte chuan solo music video an nei ta a, Jisoo tih loh chuan solo project an nei ta vek a ni.

Kum 2018 khan Jennie chuan solo music video siam hmasa berin 'Solo' a tichhuak a, Rosé chuan dawtin March thla khan a solo album hla pahnih awmna 'R' a tichhuak ve bawk. 'R'-ah hian hla pahnih 'On the ground' leh 'Gone' a awm a, heng hla pahnihte hi single-in a tichhuak ve ve a, Billboard Global 200 leh Billboard Global Excl. U.S chart-ahte No.1 hial a lo nihpui tawh a ni.

Jisoo erawh tunah hian lemchan lamah a insawrbing mek a, K-Drama-a a inlanna hmasa ber tur Jung Hae-in nena an channa 'Snowdrop' chu buaipui mekin he drama hi kumin chhung hian JTBC-ah pek chhuah hman an tum. He series-ah hian Jung Hae-in leh Jisoo-te hi college kal lai, inngaihzawng lemah an chang a ni.

Lalisa track listing
1. "Lalisa"
2. "Money"
3. "Lalisa" (instrumental)
4. "Money" (instrumental)