Marina-i hla thar a chhuak hnai e

Mizo Idol star Marina Vanlalhriatpuii Varte chuan Thawhṭanni hian music video thar 'Suakpuivungi Ruah varpui bang theh' a tichhuak dawn.

'Suakpuivungi Ruah varpui bang theh' hi folk song niin Marinai hian tunhnaiah folk song lam a hrut nasa a, a sa thiam ṭhinin helam hla a lo tihchhuah tawhte pawhin YouTube lamah thlirtu a ngah ṭhin a, chuvang chuan a music video thar pawh hi Zofate'n kan hlut leh viauin a rinawm.

'Thlawtenali' a sak phei kha chuan YouTube lamah thlirtu maktaduai 3.5 chuang a nei tawh a, chumi avang chuan Marina-i zai hi Mizo ngainat zawng tak a ni tih a chiang.

A hla tihchhuah thar tur hi Zonun Recording-in music leh recording an buaipui a, Makeup Artist chu Esther Parlour niin video chu Hebron Pictures kut chhuak a ni thung ang.

Marina-i music video tharah hian Virtual folk dance competition neih zawh taka pakhatnate kan hmu dawn a, a fanu Lalrinchhani pawh a inlan ve dawn bawk a ni.