YouTube-ah BLACKPINK an ROPUI

BLINKS chuan an tihlawhtling ta e!

YouTube-a artist subscriber ngah ber chu Justin Bieber a ni, tia sawi ṭhin chu tunah chuan 'Blackpink an ni e' tia sawi a ngai ta.

Jennie, Lisa, Jisoo leh Rosé-te chuan thuchhuah siamin,"Rin a har zawk. Kan Blinks-te'na thilpek hlu tak min pek a ni. He chawimawina hi ram hrang hranga kan fan-te, min thlawpa min ngainatute tan kan hlan e," tiin an tarlang.

Blackpink hian nimin thleng khan YouTube-ah subscriber maktaduai 66.1 an nei tling tawh a, kum rei lote chhungin khawvela artist channel subscribe-tu tam ber an ni ta der mai.

Zirtawpni khan an rapper Lisa chuan single thar 'Lalisa' a tichhuak a, chu music video chuan nimin thleng khan YouTube-ah thlirtu mtd 104 chuang a nei tawh bawk. Lisa-i music video thar tihchhuah niah khan YouTube chuan thuchhuah siamin Blackpink chu YouTube-a artist subscriber ngah ber an nih thu an puang a ni.

Thla khat vel lek liam taah khan Blackpink hi YouTube-a artist subscriber ngah ber dawttu an rawn ni a, tunah chuan subscriber ngah ber rawn ni tain, hetiang renga an fan-te an che na chho zel a nih chuan record khum harsa tak tawh tur an siam thuai dawn tih a chiang reng mai.

YouTube-ah hian Blackpink video hrang hrang thlirtu zat belhkhawm chu tluklehdingawn 9.7 chuang a ni tawh a, an music video pali- 'Ddu-Du Ddu-Du', 'Kill This Love', 'Boombayah' leh 'As If It's Your Last'-te chuan thlirtu tld an nei tling vek tawh bawk.

Blackpink dawtah hian Justin Bieber a awm ta a, ani hian subscriber mtd 65.1 a nei mek a, BTS chu pathumna niin subscriber mtd 61.2 an nei mek thung. Marshmello leh Ariana Grande-te chu artist subscriber ngah zual panga zingah an tel ve bawk a ni.

Blackpink 'mibik' an nihna ṭhenkhat:-

• Billboard Hot 100-a 'Ddu-Du Ddu-Du' 55-na an rawn nihpui khan, K-pop girl group zinga Hot 100 chart-a lawn sang thei ber an ni nghal.

• Billboard Emerging Artist-a K-pop girl group pakhatna ni thei hmasa ber an ni.

• 'Ddu-Du Ddu-Du' hmangin K-pop girl group zinga music video mtd 100-in an thlir tlin hmasa ber record an lo siam tawh.

• K-Pop group, YouTube subscriber mtd 20 nei tling hmasa ber an ni a, hemi hnua subscriber ngah lama record an siam leh ho hi chu turu tawh tak a ni.

• 'Kill This Love' an tihchhuah khan YouTube chanchina music video 'debut' pui ber a ni a, darkar 24 chhungin thlirtu mtd 56.7 an awm hman. An tihchhuah hunlai (vawiin thleng pawhin) a pui hem hem hle. He record hi 'How You Like That' hmangin anmahni vekin an khum leh.

• RIAA-in K-Pop hmeichhe group a 'certified' hmasak ber an ni.

• K-Pop group zinga music video pakhat billion views nei tling thei hmasa ber an ni bawk.

• 'How You Like That' hmangin Guinness World Records pathum an siam- most viewed YouTube video in 24 hours, most viewed music video on YouTube in 24 hours leh most viewed YouTube music video in 24 Hours by a K-pop group.