'Black Album' kha Metallica master key a ni: James Hetfield

Metallica frontman James Hetfield chuan kum 1991-a an tlangzarh 'Metallica', 'The Black Album' tia hriat lar chu an band 'master key' a nih thu Guitarworld magazine-in an kawmnaah a sawi.

Kum 58 lai ni ve tawh, singer/guitarist Hetfield chuan,"'The Black Album' kha engkim master key a ni tak zet. Heavy metal khawvela hriat kan hlawhna a ni," tia sawiin AC/DC leh U2-te nen rock khawvela tual khata an chai za theihna pawh a nih thu a sawi a ni.

"Kha legacy-a kan tel ve thei leh Metallica level sang zawnga kan hlangkai thei kha kan inchhuang tak zet," tiin a sawi bawk.

Hetfield chuan Black Album kha an larna chhan berah a pawm thu uar takin a sawi a, kawng hawnsaktu a nihzia thu a sawi a ni.

'Metallica' album August 12, 1991 khan Elektra Records kaltlangin an tlangzarh a, "Enter Sandman", "The Unforgiven", "Nothing Else Matters", "Wherever I May Roam", leh "Sad but True"-te awmna album kha niin ram 10 laiah chart topper a ni hial. Billboard 200-ah phei chuan a hunlai khan kar li chhung pakhatna a ni a, Billboard album chart topper album an neih hmasak ber a ni nghe nghe.

Khawvela album hralh tam ber zinga mi niin US-ah phei chuan Recording Industry Association of America (RIAA)-in vawi 16 tehmeuh platinum-ah a puang tawh.