A vawi khat inlannaah Olivia Rodrigo a báwr haw nghal
Olivia Rodrigo, BTS leh Lil Nas X-te an langsar ber
2021 MTV Video Music Awards chu nimin zingah khan Barclays Center, Brooklyn, New York City-ah sem a ni a, American tleirawl duhawm Olivia Rodrigo, Korean superstar BTS leh Lil Nas X-te chuan award dawng hnem berin award pathum ṭheuh an hum haw.
Kumin MTV VMA hi Madonna chuan thuchah ropui tak hmangin a hawng a, Justin Bieber leh The Kid LAROI-te chu perform hmasa berin, an hla hit 'STAY' hmangin kalkhawmte mit leh beng an titlai hle. Machine Gun Kelly leh Travis Barker-te chuan 'Papercuts' hmangin show an khar thung.
Kumin VMA-ah inlan zingah hian Olivia Rodrigo, Kacey Musgraves, Twenty One Pilots, Ed Sheeran, Camila Cabello, Alicia Keys, Doja Cat leh Foo Fighters-te pawh an tel a ni.
A vawi khat inlannaah Olivia a ropui nghal
Olivia Rodrigo chuan 'Drivers License' hmangin Song of the Year award a dawng a, Best New Artist leh Push Performance of The Year award a dawng bawk.
Olivia Rodrigo hi kumin hi MTV VMA-a a inlan vawi khatna a ni. Kumin January thlaa 'Drivers License' a tihchhuah aṭanga khawvelin a hmelhriat ṭan chauh ni mah se tunah chuan khawvela zaithiam lar ber zingah inlan tawhin MTV VMA-ah phei chuan award dawng hnem ber a ni hial tawh.
Award semna ceremony-ah hian a hla hit 'Good 4 U' chu a sa nghal a, mipuiin an lawm a, an lo zawm dual dual a ni ber mai. A huhang a na a, hmabak pawh a nei eng rem rem hle a ni.
Che ṭhazual dangte chu...
BTS chuan award pathum dawng ve bawkin, Best K-Pop, Group of the Year leh Song of Summer award-te an dawng , Lil Nas X pawhin Video of the Year, Best Direction leh Best Visual Effects award-te a hum haw ve bawk a ni.
Nomination hmu tam ber Justin Bieber chuan award pahnih dawngin- Artist of the Year award a dawn bakah Daniel Caesar leh Giveon-te a thawhpuina hla 'Peaches' hmangin Best Pop award a dawng.
Billie Eilish pawh langsar ber pawlah tel lehin award pahnih- Best Latin leh Video for Good award-te a dawng a ni.
Best R&B chu Silk Sonic, Bruno Mars, and Anderson .Paak 'Leave the Door Open'-in a dawng a, Best Rock-ah John Mayer 'Last Train Home' chu puan a ni thung.
Justin Bieber chuan kuminah hian nomination a hmu tam ber a, pakua hmuin award pahnih a hum haw thung.
MTV Global Icon Award
MTV Global Icon Award chu Foo Fighters kutah hlan a ni.
Rock and Roll Hall of Fame inductee Foo Fighters hian MTV Global Icon Award hmasa ber an dawng a, show-ah hian an hla pathum medley-in an sa nghal bawk.
Madonna leh MTV
"Kum 40 vel liam taah khan New York City-ah hian $35 leh lam pheikhawk chiah neiin ka rawn thleng.
"Kum 40 liam taah khan, mi tlawm tak dang pakhat chuan danglamna thlen beiseiin New York City hi a rawn rap a ni. Music channel zawng zawng chu zanlaiah premiere a ni ṭhin a, a hmingah MTV a inphuah. Kan intawng a, ka nun thlak danglamtu inzawmna kan nei ta a, rimawi kan thlak a, art nihphung pumpui kan siam ṭhar. Chumi a nih avang chuan zanin hian hmun pakhat chiah awmna tur a awm.
"Kan daihrei dawn lo niin an sawi a, mahse hei, heta hi kan awm si hi. Happy 40th, MT," tiin Madonna chuan thuchah mite sawizui hlawh tak hmangin kumin MTV VMA hi a hawng.
Madonna hian kum 1984 khan VMA hawnnah 'Like a Virgin' hmangin show sawizui hlawh tak khawvel hmaah a lo lantir tawh a ni.
MTV VMA hmasa ber chu kum 36 liam ta, September 14, 1984 khan New York City Radio City Music Hall-ah sem a ni.
