Zaii Hauchhum 'Nghilh har di hmasa' nghilhin an awm lo

Mystical Mizoram Ṭhazual Lengzem chart-ah Zaii Hauchhum hla hit 'Nghilh har di hmasa' chu pakhatna a ni a, Jenny Jathang 'Vawi khat tal' chu pahnihna niin Mathlenga chuan 'A pian a mawi' chu pathumna a nihpui thung.

'Nghilh har di hmasa' nghilh a har lua e

Kum 2020 Zonet Ṭhazual Award semnaah khan, Zoram mipuiin kan la hmelhriat ngai em em loh Zaii Hauchhuam chuan 'Nghilh har di hmasa' tih hla a rawn sa a, a sak zawh tuk aṭang erawh chuan Zaii Hauchhuam chu tunge a nih inzawh nawn a ngai tawh lo a nih kha.

Zaii Hauchhuam chuan a hla hit em em mai 'Nghilh har di hmasa' chu Ṭhazual chart-ah pakhatna a rawn nihpui ta.

Ṭhazual award-a live-a a sakna kha Mizo zinga live video, maktaduaiin an thlir ran ber record siam thei a ni. Chutichuan, May thla tir teah khan official music video siamin, hei pawh hian YouTube lamah chuan thlirtu nuai nga chuang fe a nei leh der tawh! Live-a a sakna phei kha chuan thlirtu maktaduai 1.6 chuang a nei tawh mawle!

He hla mawi tak leh lungkuai tak hi a tihchhuah tirhah phei kha chuan kawi tinah an play emaw tih tur kha a ni a, chart topper a ni pawh hi a phuin a mak lo hle. Chart leh lamah a dinhmuh hi a luah chhunzawm dawn em tih erawh hriat a chakawm tawh viau mai.

Jenny Jathang x 2
Jenny Jathang chuan a hla ngaihthlak hlawh tak 'Vawi khat tal' chu pahnihnaah a rawn inhlankaipui ta. Chart hmasa lamah khan he hla hi pathumna a ni a, a dinhmun a sawh nghet telh telh a, pakhatna a ni thei dawn em tih hriat a chakawm tawh hle.

'Vawi khat tal' hi YouTube lamah thlirtu mtd chuang nei tawh a ni a, a dinhmun a sang viau pawh hi thil awm tak a ni.

Jenny Jathang hian a hla tihchhuah thar ber 'Ni thar' chu pakuana a nihpui bawk. 'Ni thar' hi tunlaia Mizo hla ngaihthlak hlawh ber zinga mi a ni a, thla khat vel lek chhungin YouTube-ah thlirtu nuai hnih chuang a nei der tawh.

Pathumna Mathlenga
Mathlenga 'A pian a mawi' chu hma sawnpui zelin top 3-ah a rawn inhlankaipui der tawh.

Benjamin Sum 'Chhingmitin biahthu kan hlan' chu palina ni der tawhin Laithangpuii 'Lalsangi zai' chu pangana a ni thung.

Top 10-ah hian Siampuii Ralte, JT Production leh R Lalruatkimi-te pawh an lang a ni.