Bollywood nghawr nghingtu Baaghi 2

Kuminah sawi hat tham Bollywood film chhuak a tam lo a, Baaghi 2 a lo lan hnuah erawh thil a danglam ta.

Tiger Shroff leh Disha Patani te channa action film hi March 30 khan tlangzarh a ni a, a hit nghal rem rem hle. Tihchhuah ni la la hian cheng vaibelchhe 25.10 a lalut nghal a, Bollywood khawvel titipui ber a ni mek.

Kumina Bollywood film chhuak tawh zingah tlangzarh nia sum lalut hnem ber a ni nghal a, January thlaa tlangzarh Padmaavat chu a khum a ni. Padmaavat hi kumina film chhuak tawh zinga a hit ber tih ngam a ni a, an sumlak luh zat aṭanga teh chuan Baaghi 2 hian a khum ngei dawn niin a lang.

Bollywood star Hrithik Roshan leh Akshay Kumar te chuan Baaghi 2 hi an dahsang hle a, a changtute an fak hle bawk. Hrithik chuan Tiger Shroff chu 'Bollywood action Hero' tiin a sawi a, fakna ṭawng­kam a chhakchhuak hraw hle. Akshay pawhin Tiger Shroff chu fakin, "A che vel hian mit a tlung tak zet a, Thai action star Tony Jaa (Ong-Bak) ang mai a ni" tiin, Tiger chu 'Indian Tony Jaa' tiin hming lem a vuah.

Baaghi 2 hian Box Office-ah ni hnih lek chhungin vbch 45.50 a thawk chhuak a, dah hniam theih a ni lo.

Tiger leh Patani bakah, Shraddha Kapoor leh Prateik Babbar-te channa film hi khawpui tam takah tihchhuah a la ni lo a, a sum lakluh hi a pung chho zelin a rinawm. Cinema tam takah tihchhuah tura ruahman a ni mek a, nimin zing thleng khan hmun 3,000 velah chhuah a ni tawh a ni.

Baaghi hi kum 2016 khan tihchhuah a lo ni tawh a, a hlawhtling viau. Sum lakluh kawngah a chet ṭhat avangin Baaghi 2 a chhuak leh pawh hi a mak lo. Indian Box Office-ah pawh sum lalut hnem ber pawl a ni phak bawk. Baaghi hi Sabbir Khan chuan a direct a, tuna chhuak thar erawh hi chu Ahmed Khan kutchhuak a ni ve thung. He film hi Indian film expert tam takin an fak a, an dahsang hlawm viau bawk.

Bollywood star lar ni chho mek Tiger Shroff leh Disha Patani te hi tunhmain an la chang dun ngai lo a, Baaghi 2 hi an chan dun vawi khatna a ni. Baaghi-a lo chang tawh Tiger hi kum 28 mi a ni a, Loafer star Patani pawh kum 25 mi lek a la ni. Tiger hi nikuma tihchhuah 'Munna Michael' ah khan a inlan a, film eng emaw zat a lo chang tawh. Patani pawh hian sulhnu a nei ṭha hle a, Kung Fu Yoga (2015) leh M.S. Dhoni: The Untold Story (2016) ah te pawh a lo inlan tawh bawk. An ni pahnih hi Baaghi 2 hlawhtlinna chhan ber pakhat tiin a sawi theih bawk.