MDM artist-te hla streaming service hrang hrangah dah ṭan

Music Domain Mizoram (MDM)  leh a thawhpui label, St Ange chuan internet hmanga hla ngaihthlak theihna (streaming service) hrang hrangah Mizo artist-te hla an dah ṭan ta.

St Ange hi Independent Label, khawvel pum huap pawha music production leh publishing tithei tura sorkar registration nei a ni a, digital content chungchanga MDM lo pui reng tawh ṭhin anni bawk.

MDM hi artist-te hamṭhatna tura hma la reng ṭhin anni bawk a, stream theih tura artist-te hla chhawpchhuah hi an tumna a rei tawh a, an hlawhtling chho ṭan ta a ni.

MDM leh St Ange-te project hi chhawng tam tak a ni dawn a, a bulṭanna atan hian artist panga - Lalremruata, C Sanga, Hlimhlimi, Feli fanai, Manuna leh Zorinzuali Khiangte-te zai publish phawt a ni a, an hlate hi Spotify, Apple Music leh iTunes, Amazon Music leh service dangahte ngaihthlak theih a ni tawh a, tunlaia social video siamna app lar tak, TikTok-ah te pawh an hla hi hman theih a ni tawh bawk. IG leh FB story-ahte pawh dah zel an tum a ni.