Kum hnih hnuah MET GALA Milar fuankhawmte thlalakin internet a luah hneh
Kum 2020-a Covid-19 hripui leng vanga an ṭhulh tak, New York City-a Metropolitan Museum of Art's Costume Institute ṭanpuina tura kum tina buatsaih ṭhin, fashion event ngaihven hlawh tak Met Gala chu Thawhṭanni zanah (India ram huna nimin zing) khan neih a ni leh ta.
Milar fuankhawmte an hmuhnawm a, kumdang ang bawkin incheina maksak pui puia inchei lah bo lo, internet lamah thlakak hmuhnawm tak tak hmuh tur a tamin, memes pawh hmuh tur a awm nghal nual mai.
Kumin Met Gala hi American fashion designer leh film siamtu lar Tom Ford, Instagram head Adam Mosseri leh Anna Wintour-te chuan an chair a, lemchan thiam lar Timothée Chalamet, zaithiam Billie Eilish, American poet tunlaia huhang ngah tak Amanda Gorman leh Japanese tennis player Naomi Osaka-te chu co-chair an ni thung.
"In America: A Lexicon of Fashion" chu kumina an thupui niin, Instagram chuan kumin Met Gala hi an sponsor a, Justin Bieber chu show headline a ni bawk.
Kuminah hian kumdanga mi ngaihven ber ṭhin zinga mi Blake Lively a inlan lo a, Beyonce leh Lady Gaga-te pawh inlan lo langsar zual an ni.
Inlan langsar zualte chu
Co-chair Billie Eilish, Met Gala History-a co-chair naupang ber ni bawk chu Oscar De La Renta gown nen Met Gala-ah hian a inlan a, mi ṭhenkhat phei chuan Marilyn Monroe nen inang an ti hle nghe nghe. Metropolitan Museum of Art step-a a kal lai phei chuan a kawrfual chu mi panga laiin an lo kenpui hial!
Gigi Hadid leh Kendal Jenner-te ṭhiandun an hmuhnawm. Rihanna pawh a chhas A$AP Rocky nen inlan dunin ASAP inchei dan a dangdai a, anni pahnih hi an infun lum ṭha dun hle.
Eiza Gonzalez, Lil Nas X, Adrien Brody, Valentina Sampaio, Elliot Page , Lorde, Megan Fox, Justin Bieber-te nupa, Tennis superstar Emma Raducanu, Alicia Keys, Kristen Stewart, Emily Ratajkowski-te pawh hmuh tur an awm a, anni bakah hian celebrity tam tak an inlan bawk.
Ben Affleck leh JLo
Jennifer Lopez leh Ben Affleck inlan dunin ngaihven a hlawh. Social media lamah an hmai tuamna chhana an infawp hmuh tur a tam a, tunhnaiah an inzui thar leh avangin chanchin eng eng emaw an neih lai tak a ni bawk nen, anni pahnih inzui netizens titi ber pakhat a ni.
Dangdai Kim
Kim Kardashian inchei danin sawi zui a hlawh. Balenciaga thuam inbelhin a kezungpui hmawr aṭanga chhip thlengin puan dumin a inkhuh chhuak vek! A hmel pakhatmah hmuh tur a awm lo. Social media lamah memes hmuh tur a tam zui hle.
roses_are_rosie
Blackpink member Rosé chu a vawi khatna atan kumin Met Gala-ah hian a inlan. K-Pop artist hmeichhe zinga Met Gala-a inlan hmasa ber niin, Saint Laurent ambassador a nih angin an thuam a inbel a, Saint Laurent creative director Anthony Vaccarello nen Met Gala hi an chhim a ni.
