Zofate Gospel Charity For Myanmar - zaninah

Zofate Gospel Charity For Myanmar chu zanin dar 8-ah hian Glory Mizo Channel-ah buatsaih a ni dawn.

Mi ṭhenkhat chuan kan zaithiamte leh milarte bakah mi hrang hrang status/story kaltlang velin kan lo hmu tawhin a rinawm, Myanmar rambuai vanga harsatna tawk kan Zohnahthlak unaute ṭanpuina tur Zofate Gospel Charity For Myanmar-ah hian zaithiam hrang hrang inlan tur an ṭha hle.

He programme hi kan zaithiam te bakah mi ṭhahnem ngai hrang hrang, kan thuhriltu lar ṭhenkhat, YouTuber leh social media lama huhang ngah tak takte'n an buatsaih a ni a, Australia, UK leh US lama Zohnahthlak unaute pawhin an rawn thlawp bawk a ni.

Ṭanpuina chu Google Pay leh bank account kaltlangin a pek theih dawn a, Vanlalsailova leh Esther Jongte-te'n he programme hi an host dawn a ni.

Inlan turte chu
Zaithiam chuai thei lo, kum tam tak chhung Mizo zinga top artist ni tawh Vanlalsailova a inlan dawn a, tunlaia zaithiam huhang ngah ber pawh Benjamin Sum a inlan dawn bawk. Gospel singer lar leh Grace film-a achangtupa ber Zorema Khiangte pawh a inlan dawn a ni.

Hmeichhe lam pawh inlan tur an ṭha viau. Tunlai Gospel singer hmeichhe zinga an zai Zofate'n kan ngaihthlak nasat ber ber, Maruati, Duhsaki Khiangte, Hlimhlimi leh Lawmi Khiangte te an zai dawn. Chumai a la ni lo, Mizote'n a zai kan ngaihthlak kham theih loh Lalrindiki Khiangte a inlan dawn bawk.

Rhyme & Reason Mafela leh Dr. Dennis Ramdinmawia te pawhin he hunah hian thutawi an sawi dawn bawk a, mit leh beng a tlai viau ang.