April 13-ah Lelte Award sem dawn

Mizo rimawi lama chawi­mawina sem chhuah ṭhin zinga hlun ber pawl, Lelte Award chu April 13 khian a vawi 27 nan sem a ni leh dawn ta.

Lelte Award 2018 hi Chanmari YMA Hall-ah sem a ni dawn a, nominee pawh puan a ni tawh. Category hrang hranga award dawng thei tura chawpchhuahte hi tunlai ziathiam kan neih zingah chuan a ṭha ber berte an ni hlawm.

Kum danga la awm ngai lo ‘Pavalai Zaipawl of the Year’ thlanna a awm dawn. Hetih rual hian ‘Music Video of the Year’chu mimal leh group ah ṭhen tawh loin group khatah dah a ni tawh thung.

Heng bakah hian Song of the Year, Lifetime Achievement Award, Young Achiever Award, Article of the Year, Music Reporter of the Year, Chibil Award - Hmar, Lai,Tahdo/Kuki, Mara, Paite leh Jampui Tlangdung Zofate bakah, mi pahnih hnenah Special Award hlan a ni dawn bawk.

Nominee-te chu
Lengzem lamah chuan Singer of the Year (Male) award dawng thei turin Lal­­­lawm­awma, Israel Lal­­­biakrema, KimKima, Manuna leh F. Zomuanpuia te chhawpchhuah an ni. Tun lai mipa zaithiam zingah chuan a ber tih ngam ṭhah an ni a, award dawng tur rin thiam pawh a harsa hle. Hmeichhe lama chhawpchhuahte pawh hi an duai lo hlawm hle a, Feli Fanai, K.Lalthlamuankimi (Mami), DJ Lalvenhimi, Zorinzuali Khiangte leh R.Lalhmangaihzuali te an ni nawk.

Gospel lamah chuan Gospel Singer of the Year (Male) award dawng thei turin Sawmtea, TBC, Betea, Amtea leh An­drew Laltlankima te an lang. Hmeichhe lamah pawh Temi Sailo, Lalduhsaki, Zoramchhani, Lalhlumawii leh Mawiteii Ralte an lang a, award dawng thei turin an awm viau hlawm. Choir of the Year category-ah Synod Choir an langsar a, ram pawn thlenga hriat hlawh chho mek Mizo Cardinal Choir an awm bawk. Anni bakah hian BCM Choir, Synod Mission Choir leh The Lepsory Mission Choir-te an la awm cheu bawk.

Hla phuah thiam zing­ah Lalnunpuia Hrah­sel, PL Engmawia, C.Lalzarmawia, JH Vanlal­hruaia leh Lal K Sailo te chu 'Song Com­poser of the Year' award dawng thei tura chhawpchhuah an ni. 'Band of the Year' atana thlan tur zingah Hornbill Festival 2017-a che ṭha tak Avora Records leh The Prophets-te an lang a, anni bakh hian Shai Hills, Triau Trackx leh T Melody-te an lang bawk.

Music Video of the Year' category pawh a hot viau dawn a, Ṭhazual Chart-ah pawh hun rei tak chhung pakhatna lo hauh tawh Feli Fanai chu a langsar hle. New Artiste of the Year dawng thei turin Arini, Cindy Lal­than­puii, Rpa Ralte, HT Lal­thanzami leh Kimkima te chhawpchhuah an ni bawk.