Cancer natna hnehtu Dave Mustaine

Megadeth frontman Dave Mustaine chuan cancer natna a vei tawh loh thu Zirtawpni liam taa London's Wembley Arena-a show an neihnaah a sawi.

Nikum June thla khan Dave Mustaine hian cancer a vei tih hriatchhuah a ni a, kum khat pawh a liam hmain a dam thu hi a puang leh ta a ni. Radiation treatment vawi 51 a lak hman bakah chemotherapy treatment vawi kua a la hman.

Megadeth-in album thar an record laiin cancer a vei tih hi an hriat chhuah thu sawiin, an recording neih lai zawng zawng pawh chu an chawlhsan nghal vek tih a sawi. An fan kalkhawmte hmaah chuan, nitin a ṭawngṭai ṭhin thu sawi bawkin,"October 16 khan doctor hmu turin ka kal a, doctor chuan cancer lakah hian 100%-in i fihlim min lo ti a ni," a ti.

Nikum khan Megadeth hian 'Warheads on Foreheads' an tlangzarh a ni.

Mustaine-a'n cancer a vei tih hriat a nih hnu khan Megadeth hi hun eng emaw chen chu an chawl a, tunhnai lawkah khan mipui hmaah a inlan leh ṭan a ni. Bassist David Ellefson chuan Facebook-ah an fan-te hnenah an ṭawng­­ṭaina avanga lawmthu sawiin, ṭawng­ṭaina chuan hna a thawk tih a sawi a, an frontman hoa stage an chuangkai leh thei chu lawm­awm a tih thu a sawi bawk.