Shang-Chi-in hlut a la hlawh chhunzawm zel

North America Box Office-ah 'Shang-Chi and the Legend of the Ten Rings' bawk pakhatna a ni leh a, kar hmasa lama pathumna 'Free Guy' chu pahnihnaah rawn inhlangkai leh thungin film thar 'Malignant' chu pathumna a ni thung.

Shang-Chi-in hlut a la hlawh
'Shang-Chi and the Legend of the Ten Rings' hi kar hmasa lamah khan Box Office-ah pakhatna a ni tawh a, Labour Day weekend-a sum lalut tam ber record hial a lo siam tawh.

Tun kar tawp liam taah pawh khan theatre 4,300 aṭangin $34,701,070 lai a lalut leh a, khum thei an la awm rih lo. Shang-Chi hian North America Box Office-ah $146,964,744 lai sum lalut tawhin MCU film tho 'Black Widow' chu khumin kumin chhunga North America Box Office-a $mtd lalut thling rang ber a ni.

North America pawn lam aṭangin $112,000,000 lalut tawh bawkin tlangzarh a nih aṭangin kar hnih em pawh a liam hmain $258,964,744 lai a lalut der tawh!

Film review-tu lamin an fak rawn Shang-Chi hi kumin chhunga film tihchhuah tawh zingah chuan hlawhtling ber zinga mi a ni der tawh a, a sum lakluh pawh a turu chho viau dawnin a lang.

Shang-Chi dawtah hian Ryan Reynolds channa 'Free Guy' chu awm thungin $5,579,870 sum a lalut a, he film hian North America Box Office aṭangin $101,599,920 lai a lalut ve tawh bawk a ni.

Beisei angin Malignant 'Box Office'-ah a hráng nasa lo
James Wan-a film, $mtd 40 vel lai senga an siam, horror film 'Malignant' chu beisei ang em emin Box Office-ah a hrang ring lo a, pathumna a ni phak ṭawk.

Annabelle Wallis, Maddie Hasson leh George Young-te channa hi kar tawp liam taah khan theatre 3,485-ah chhuah a ni a, $5,434,620 a lalut. North America pawn lam aṭangin $9,300,000 lalut ve bawkin $14,734,620 a lalut tawh a ni.

Film tlangzarh thar zinga che ṭha ber ni mah se film thawm nei ring pahnih 'Shang-Chi' leh 'Free Guy'-te a tluk pha ta lo.

Film thar a awm nual
Film thar en tur duh tan chuan, film thar eng emaw zat a awm. Box Office Mojo chart-a film tarlan 48 zinga film pakua lai chu tlangzarh thar a ni. Pariatna 'The Card Counter' leh pakuana 'Show Me the Father'-te chu film thar an ni a, After We Fell (11), The Alpinist (13), Small Engine Repair (21), Language Lessons (27), Dating & New York (31) leh Azor (37)-te chu chart-a film thar lang an ni bawk.