Apple iPhone 13 series chu hei le

Apple chuan Thawhlehni khan 'California Streaming' virtual launch event-ah iPhone 13 series hrang hrang tur an puangzar ta.

Mi tam tak rin lawk ang ngeiin iPhone 13-ah hian model pali a awm dawn a, iPhone 13, iPhone 13 mini, iPhone 13 Pro, leh iPhone 13 Pro Max-te an tichhuak dawn a ni. Heng phone palite hi model hmasa ho nen an size a inang hlawm dawn hle a, design lamah pawh danglamna a tam lo.

Chhinchhiah tlak erawh chu, battery a ṭha zawk dawn a, camera a ṭha zawk dawn bawk. Cinematic video recording mode chu ngaihven hlawh tur a ni bawk ang. iPhone tharte hian A15 Bionic SoC a hmang vek dawn a, iOS 15 a hmang dawn bawk.

India ramah eng zatin nge an zawrh dawn?
iPhone 13 leh iPhone 13 mini-te chu a storage azirin variant pathum a awm dawn. iPhone 13 mini 128GB chu Rs. 69,900-in an zuar dawn a, 256GB chu 79,900-a zawrh tur niin 512GB chu Rs. 99,900 a ni thung ang.

iPhone 13 chu Rs. 79,900, Rs. 89,900 leh Rs. 99,900 mante a ni dawn bawk.

iPhone 13 Pro leh iPhone 13 Pro Max-te chu 1TB thlengin a awm dawn. iPhone 13 Pro bik hi 128GB Rs. 1,19,900, 256GB Rs. 1,29,900 , 512GB Rs. 1,49,900 leh 1TB Rs. 1,69,900-te a ni dawn. Series sang ber iPhone 13 Pro Max chu 1,29,900, Rs. 1,39,900. Rs. 1,59,900 leh Rs. 1,79,900-te a ni dawn a, a to hlawm dawn rem rem viau.

India ramah engtikah nge an zawrh chhuah dawn?
India ramah chuan September 17 aṭang hian a pre-order theih tawh hmel a, September 24 vel aṭang chuan an zuar chhuak ṭan tawh maithei.