Billboard tualah Drake a vawk lal len

Canadian singer/rapper Drake nge nge, a lo ropui e. September 3 khan a studio album parukna 'Certified Lover Boy' a tlangzarh a, he album hi US mipuite'n an ngaihlu rem rem hle. Billboard 200 chart-a topper a nih bakah, Billboard Hot 100 chart-ah record a siam hial!

Billboard 200 sawi phawt ang
Drake hi 'Certified Lover Boy' hmangin Billboard 200 chart-ah topper a ni. Kar liam ta khan he album hian Equivalent Album Unit 613,000 a hmu chhuak a, hei hi kumina kar khat chhuanga Album EAU tam ber a ni. Kumin bik atan chuan hei hi record a ni phawt.

Billboard 200 chart-ah hian Drake hi vawi 10 topper a ni ta chiah a, EAU 613,000 aṭanga 46,000 hi album sales a ni a, 562,000 lai chu on-demand stream aṭanga a hmuh chhuah niin kar liam ta khan Drake album thar hi an stream nasa rem rem hle.

Billboard history kum 65 chhungin artist pariat chiah Billboard 200 chart No.1 album 10 nei thei an la awm a, chung zingah chuan Drake hi a tel.

The Beatles kha he chart-ah hian vawi 19 zet topper an ni a, Jay-Z (14), Bruce Springsteen (11), Barbra Streisand (11), Drake, Eminem (10), Elvis Presley (10) leh Kanye West (10)-te chu he huangah hian an awm tawh bawk. Tunah chuan Drake hi heng mi ropuite huangah hian rin luh a ni ve ta.

Artist 100 chart-ah pawh Drake hi topper a ni a, Hot R&B/Hip-Hop Songs Chart lamah pawh Drake-a hming a intlar thla duat a ni.

The Hot 100 ve thung chu
Lil Baby, Lil Durk, Giveon, Jay-Z, Travis Scott, Future, Young Thug, Yebba, 21 Savage, Project Pat, Tems, Ty Dolla Sign, Lil Wayne, Rick Ross, leh Kid Cudi-te a thawhpuina album-a hlate hi kar hmasa khan US-ah chuan an ngaithla nasa em em ringawt mai a ni.

Billboard Hot 100 chart top 10-ah Drake a hla pakua zet chu a lang. Chumai a ni lo, a album-a hla zawng zawng, hla 21-te chu Hot 100 chart top 40-ah an lang phak vek.

Hot 100 top 10-a album pakhata hla lang tam ber record, a hmaa a lo siam tawh sa chu amah vek hian a rawn khum.

Khawvela band ropui ber nia mi tam takin an ngaih, The Beatles chiahin an tih theih tura ngaih, Billboard Hot 100 top 5-a hla zawng zawng chu Drake-a hla vek hi a ni. He record hi The Beatles khan kum 1964 khan an lo siam daih tawh a, kum tam tak liam hnuah Drake hian a rawn nihrual ve leh ta a ni. He record kher hi chu khum a harsa leh tawh viau ang.

Billboard chart-a lang dangte chu
Billboard 200 chart-ah chuan kar hmasa lama pakhatna Kanye West album 'Donda' chu pahnihna a ni a, mi tam takin an ngaihven Iron Man album thar 'Senjutsu' chu pathumna a ni thung. Olivia Rodrigo 'Sour' chu palina a la ni phak a, Doja Cat chuan 'Planet Her' hmangin top 5 a khar.

Artist 100 chart lamah chuan Drake pakhatna a ni a, Kanye West chu pahnihna ni ve thungin, Iron Maiden chu pathumna an ni.

Billboard Hot 100 chart top 10-ah hian Drake-a hla ho karah The Kid LAROI & Justin Bieber 'Stay' chu a inzep ve a, parukna a ni. 'Stay' hi Global 200 chart-ah leh Global Excl. US chart-ah topper a ni bawk.