PRS Pulse Artist Bobo Renthlei

Khawvela guitar company ṭha leh lar ber pawl, John Mayer, Mark Tremonti leh Carlos Santana-te pawh thawhpuitu, PRS Guitars chuan Ningani zanah khan Class of 2022 PRS Pulse Artists list tichhuakin, chung zingah chuan Mizo tlangval, Stacy's Penitence guitarist Bobo Renthlei a tel.

PRS hian nikum aṭang khan Pulse Artist program hi kalpui ṭanin, PRS guitar hmangtu, an tualchhunga huhang nei ngah deuh leh thawm nei ring deuhte zawng chhuaka thlawp chhunzawmna turin he programme hi an siam a ni. Nikumah khan ram hrang hrang aṭangin Pulse Artists-ah hian mi 84 an lalut a, kuminah erawh mi 22 chiah lalutin, chung zingah chuan Bobo hi a tel a ni.

Bobo Renthlei hian Zoram rimawi khawvelah sulhnu eng emaw zat a hnut chhiah tawh a, Mizo zinga guitarist lar ber pawl niin PRS hi hun eng emaw chen a perh tawh a, tunah chuan Class of 2022 PRS Pulse Artists list-ah hian a hming a lang ta a ni.