Box Office ; Pacific Rim Uprising vul lai a rei lo Ready Player One a inlar

Thla hmasa lawka tlangzarh Pacific Rim Uprising chuan North American Box Office-ah sum lalut tam ber dinhmun hauh hman mah se a vul lai a rei lo. Hetih lai hian thriller film Ready Player One a rawn lang a, sum lakluh tam lamah tuma tluk rual a ni lo.

Ready Player One hi March 28 khan tlangzarh a ni a, tun weekend chhung khan $mtd 53.2 la lutin, No. 1 a hauh nghal. American filmmaker Steven Spielberg kutchhuak sci-fi movie hian awlsam takin tun hnaia film chhuak dang 'Acrimony' chu a leh thal a, Pacific Rim Uprising rorel lai a tihtawp sak bawk. Easter weekend-ah sum leng a tam a, kar hmasa lam aiin sum che vel a hraw zawk.

March thla tawpa tihchhuah Psy­chological thriller 'Acrimony' chuan $mtd 17.1 lalutin, sum lalut tam pahnihna a ni. Hetih lai hian Box Office-a hun eng emaw chen ro lo rel tawh Black Panther chu sum lalut tam pathumna a ni a, $mtd 11.3 lai a la hlawh chhuak. Black Panther sum lakluh tawh zat hi $mtd 900 chuang zet a ni a, a pui rem rem hle. I Can Only Imagine chuan $mtd 10.7 thawk chhuakin sum lalut tam pali-na a ni a, Pacific Rim Uprising chu panga-na a ni. Box Office-a pakhatna dinhmun hauh ve zawk tu Pacific Rim Uprising hian $mtd 9.2 a thawk chhuak a, a sum lakluh a tlahniam hle. A sum lakluh tlakhniamna hi 67.3% lai a tling.

Box Office-a sum lalut hnem zual 10-te sum lakluh belhkhawm hi $mtd 120 a chuang a, kar hmasa lam aiin a sang zawk a ni. Hetih rual hian top 10-a lang film tam zawk chuan $mtd 10 an thawk chhuak pha lo thung.