ISRO-in GSAT-6A satellite kapchhuak

Indian Space Research Organisation (ISRO) chuan March 29 khan GSAT-6A satellite an kapchhuak a, inbiak pawhna tura tih a ni.

GSAT-6A satellite hi Andhra Pradesh-a Srihari­kota-a Satish Dhawan Space Center-a Second Launch Pad (SL) aṭangin hlawh­tling taka kahchhuah a ni. He satellite hi kg 2,140 zeta rit a ni a, meter 49.1-a sei a ni. GSAT-6A hi hmun kilkhawr zawk aṭanga inbiakpawh theihna tur kawnga pui thei tura duan a ni a, kum 10 chhung hman theih tura ngaih a ni.

He hi India chuan a sipaiten an chhawr ṭangkai theih tur leh inbiak pawhna kawnga pui thei tura a duan a ni. Satellite hian meter ruk-a zau antenna a nei a, ISRO communication satellite in a hman tawh zingah chuan a lian ber niin, s-band communication atana hman tura tih a ni. India communication satel­lite zingah chuan a chak ber nia sawi a ni bawk.

GSAT-6A hian hlawh­tling takin ṭum khat chu khawvel a thlawh kual tawh a, mahse tunah chuan biakpawh theih lohin a awm mek. A ṭum hnihna tur a thlawh kual hnu aṭanga minute li hnu lekah data engmah a rawn thawn let tawh lo a, a chhan chhui chian mek a ni.

GSAT-6A satellite hi In­dian Space Research Orga­nisation Satellite Centre-ah kum 12 chhung siam a nih hnuin kahchhuah a ni a, engtiang chiaha hman tlak nge a nih dawn hriat thiam a harsa rih hle.