Krismas-ah Lana Del Rey album thar kan ngaithla hman dawn

'Born to Die' singer Lana Del Rey chuan US President thar tur thlan vote chhiar zan khan social media kaltlangin a album thar tur tlangzarh hun an tihkhawtlai tak “Chemtrails Over the Country Club” chu Krismas-ah chuan chhawp chhuah hman a ni dawn tih a sawi.

Lana Del Rey hian Instagram-ah a ngaihzawng tlangthang mek Clay John­son nena res­taurant-a an chawlh dun lai video post-in US in­thlan result chungchangte an sawi dun a, hetah hian a album thar tur chungchang hi sawi chhuakin Krismas-ah chuan a album thar tur tlangzarh hman ngei a tum thu leh American standard leh classic digital record a nih dawn thu a sawi chhuak a ni. 

A album thar tur bakah hian Liverpool football club documentary-a mi tur 'You'll Never Walk Alone' acapella-a a sak thu a sawi lang bawk a, hei hi Liverpool fan-te tan chuan thu ngaihnawm tak a ni ngei ang.

Del Rey chuan a album thar tur chu kar 16 aṭanga 17 vel tihkhawtlai a ni tawh tih sawiin hei hi vinyl pressing plant-a backlog a awm vang tihte pawh sawiin chu chu March 5 hma chuan an hawng dawn ta si lo a, hemi a nih avang pawh hi a niang digital-a tlangzarh mai hi a thlang ta a ni.

A album thar tur chu a peihfel tawh a, kum hmasa lama Grammy nomination a hmuhna “Normal F—ing Rockwell” nen chuan a danglam hle dawn tih a sawi bawk a, eng lam nge a rawn hawi dawn tih Lana Del Rey fan-te chuan an nghalhlel tawh hle ang.

'Summertime Sadness' hitmaker hian 'You'll Never Walk Alone' acapella-a a sakna hi a instagram account lamah a dah nghe nghe a, 

a caption-ah "You’ll never walk alone- accapella For the new documentary about Liverpool x" tih a ziak a, hei ringawt pawh hi mi maktaduai chuangin an thlir.

“Chemtrails Over the Country Club” hi Lana Del Rey studio album pasarihna tur a ni a, ruahmanna an siam lawk dan chuan kumin December 10 emaw nakkum January 7-ah chuan tlangzarh hman a tum a, tuna Del Rey sawi dan hmang hi chuan Masi boruak velah chuan kan ngaihthlak hman ngei hmel.  Interscope Records leh Polydor Records kaltlangin he a album thar hi a tlangzarh dawn a, September 5-a a tlangzarh tum tawh kha niin a la tikhawtlai ta zel a ni.

Track pali awm tur chu a chiang tawh a, chung zinga mi "Let Me Love You Like a Woman" chu October 16 khan single-in a lo tichhuak tawh nghe nghe.