April 9 aṭangin MZU festival lian Virthli Ṭan dawn

Mizoram University (MZU) chuan kum tina festival lian an buatsaih ṭhin Virthli Festival chu April 9 aṭang khian ṭan a ni dawn a, ni nga chhung a awh ang.

MZU festival lian hi 'Varsity Fest' tih leh 'Vibrio' tia sawi a lo ni tawh ṭhin a, kumin aṭangin 'Virthli' tia thlak a ni.

He festival-ah hian kum danga item lo neih tawh ṭhin - Quiz, Debate, Varsity Miss, Runway Showdown, Rock Fest, Got To Dance, Writing Competition, Futsal leh a dangte a awm leh dawn a, kum danga la awm ngai lo telh thar a awm bawk.

Ṭhang tharte 'Idol' thusawi ngaihthlak a, titiho theihna leh thalaite mamawh leh ngaihven thil pawimawh tak tak sawihona tura 'Virthli Talk' tih chu telh thar a ni. Hei bakah hian University Mister thlanna tihte telh thar a ni dawn bawk.

Tun ṭum festival-ah pawh hian Varsity Miss thlanna te, Runway Showdown leh Rock Fest te chu ngaihven hlawh a ni leh dawn. Varsity Miss thlanna hian ngaihven a hlawh ṭhin a, Department hrang hrangten an nula neih ṭhat an thehchhuak leh ngeiin a rinawm.

Runway Showdown-ah hian college lamte tan pawh tel theih a nih avangin a hlu ṭhin hle. Rock Fest aṭang hian hriatzui hlawh tak tak band eng emaw zat an lo chhuak tawh a, Open a nih avangin kuminah pawh tel an ṭhehnem leh viau turah ngaih a ni.

MZU-a zilaite chuan kum 2006 aṭng khan festival hi an buatsaih ṭan a, hlut pawh a hlawh ṭhin hle. Festival hming atan hian a tirah Varsity Fest tih vuah a ni a, Vibrio tia thlak leh a ni. Kumin aṭangin zirlaite remtihnain 'Virthli Festival' tia vuah a ni leh ta a ni.

Festival hi MZU zirlai ni lo tan pawh a chhim theih dawn a, entry card neih a ngai thung dawn. Entry card hi chi hnih siam a ni a,

Gold Card hi Rs.1,000 man niin, mi pathum luh theih a ni ang. Rs. 500 man Normal Gate Card pawh siam a ni a, mi pakhat chauh hman theih a ni thung. Entry card hi Cannon Photo, Hrangbana College opposite-ah lei theih a ni.