Spice Girls-in Exhibition buatsaih dawn

Reunion nei leh tura inbuatsaih mek Spice Girls chuan anmahni pualin London-ah exhibition buatsaih an tum thu an sawi.

English pop girl group hian July 28 aṭanga August 20 chhung khian Business Design Centre, Angel Islington, London-ah 'The Spice Girls Exhibition' hi buatsaih an tum a ni. Hemi chungchang hi tun hnai khan an tarlang a, fan-te an phur tawh hle.

He exhibition-ah hian Spice Girls thuam leh thil hlui chi hrang hrang phochhuah a ni ang. An vanglaia an inthuamna thawmhnaw tam tak kha pho chhuah a nih dawn avangin fan ruhkawl te tan chuan a hlu hle dawn a ni. He hunah hian bus lianpui 'Spice Bus' an tih ṭhin pawh kha exhibition neihna kawtah chhawpchhuah a ni dawn bawk.

Spice Girls-ah hian member panga - Victoria Beckham, Mel B, Mel C, Geri Horner leh Emma Bunton-te an awm ṭhin a, an kehdarh hnuah inzawmkhawm tumin hma an la leh mek. Exhibition an neih tur pawh hi hemi kawnga an hmalakna pakhatah ngaih a ni.