MPSC Challenge Inter College Quiz Competition 2018 Grand Finale-a intum tur PUC vs HBC
MPSC Challenge Inter College Quiz Competition 2018 chu zaninah a hmawr bawk a ni dawn ta a, Pachhunga University College leh Hrangbana College-ten champion nih an inchhuh dawn.
Grand Finale hi Ignite Studio, Khatlaah neih a ni dawn a, zan dar 8:00-ah show ṭan a ni ang. He quiz competition hi Lalrinthari Zadeng in a host a, zaninah pawh intihsiak boruak sang tak a kaihruai leh dawn a ni. Grand Finale-a inlan turte hi college lian pahnih an nih avangin ṭantu pawh an ngah dawn a, en loh phal chi a ni lo vang.
Tunge ṭha zawk?
HBC hian semi-final-ah point 115 hmuin final hi an inhlangkai a, PUC chuan point 95 an hmu. College pahnihte hian semi-final-a an khingpui Govt. Champhai College leh Aizawl City College-te an hneh a, zaninah MPSC Challenge Inter College Quiz Competition vawithumna Champion tur a chiang dawn. Semi-final-a point hmuhnem zawk HBC-in rin an kai a, hetih lai hian Quiz neih chhung zawnga chet chhiat nei lo PUC dahhniam theih an ni lo.
Mizorama College lian pahnih hian ṭha zawk nih an inchuh dawn a, chak lo zawk nih an duh hauh lo ang.
Inlan turte
PUC aiawh turte hi Christopher Rodingpuia leh Samuel Malsawmzuala te an ni. HBC zirlaite aiawha inlan leh turte hi Jonathan Lalngaihzuala leh Malsawmkimi te niin, Grand Finale-ah hmeichhia pakhat chauh kan hmu dawn.
Malsawmkimi hi nikum khan zawhna chhang dik hnem ber a lo ni tawh a, round hmasa lamah a lo chet ṭhat tawh bawk avangin boruak sanga zam mai tur chi a ni lo.
Hetih lai hian Christopher leh Samuel-a inkawp hi an hmuhnawm ṭhin a, Christopher hi tun ṭum bikah hian zawhna chhang dik hnem ber a ni mek. MPSC leh MSU buatsaih Quiz Competition-a telkim vek thei hi final zan hian a che ṭha leh a nih pawhin a mak lo ang. Grand Finale zan hian he intihsiakna neih a nih chhunga zawhna chhangdik hnem ber hnenah lawmman hlan a ni bawk ang a, zanina an chet ṭhatin kawngro a su hle dawn a ni.
Lawmman lam hi
Pakhatna hian lawmman Rs. 40,000 bakah, trophy leh certificate an dawng dawn. Pahnihna hian pakhatna dawn zahve Rs. 20,000 an dawng dawn a, trophy leh certificate a keng tel bawk ang. Semi-final-a tla Champhai leh City College hnenah Rs. 8,000 ve ve hlan an ni ang. Aizawl pawn aṭanga lo telte hnenah T.A pek an ni a, a tel zawng zawng tan participation prize siam a ni bawk.
MPSC Challenge Inter College Quiz Competition 2018-ah hian District hrang hrang aṭangin College an tel kim a, Aizawl chhunga College-te nen an vaiin 18 an ni. College 10-te'n quarter final an lut a, a tiṭhha zual pali-in semi-final an lut. Semi-final hi April 3 leh 4 zan khan neih a ni a, HBC leh PUC-te an tlang a ni.
HBC hi MPSC Challenge Inter College Quiz Competition Champion lai an ni a, PUC hi MZU sport neih zawh taka champion kha an ni. Zanina an intihsiakna tur erawh rilru hmanna tur a ni a, inbuatsaihna neiṭha an dingchangin a rinawm.
Show hi live-a pekchhuah a ni leh dawn a, Zonet Zawlbuk leh LPS 10-ahte en theih a ni ang.